Minister leh MEA Joint Secretary inkâwm

Commerce & Industries minister F Rodingliana chuan September 12, Ningani khan a pisaah sorkar laipuia Ministry of External Affairs (MEA) joint secretary (Bangladesh & Myanmar) B Shyam a kâwm a; Mizoramin ṭha zawka Bangladesh leh Myanmar-te nen insumdawn tawnna a kalpui dan tur a sawipui.

Sorkar thuchhuah tarlan danin, F Rodingliana chuan, Mamit district-a Silsury khaw ep, Bangladesh lamah market a ṭhat avangin Silsury emaw, a bul hnai remchang laiah emaw integrated check post/land custom station sak vat a nih theih dan tur leh Kaladan Multi Modal Transport Transit Project thawh meka harsatna awm chinfel dan tur B Shyam a sawipui a ni.

Bangladesh nena lei (bridge) dawha inkalpawhna tur ruahman sa, Kawrpuichhuah bula integrated check post lei siam tur chu Bangladesh lamin an remtih vat theih nan leh hna ṭan thuai a nih theih nan sorkar laipuiah nawrpui turin F Rodingliana chuan a ngen bawk.

MEA joint secretary B Shyam chuan, India sorkarin Myanmar ram chhung Paletwa thlenga kawlphetha pek a, chumi hnuah Sittwe lawng chawlhhmun thlenga pek a duh thu sawiin, Mizoram sorkar chu thawhpuiah a sáwm a; Power & Electricity minister F Rodingliana chuan PE department-in detail project report siama tihhlawhtlin an inhuam thu a sawi.