Green teacher-te khuai khawi zirtir

Mizoram Pollution Control Board (MPCB) leh Mizoram KVI Board chuan September 12-23, 2024 chhungin KVIB Multi-Disciplinary Training Centre (MDTC)-ah khuai khawi zirna an buatsaih a, sikul 17-a eco-club hrang hrang aṭangin zirtirtu (green teacher)-te an tel.

Khuai khawi zirna hi sorkar laipuia Ministry of Environment, Forests and Climate Change bultumin Environment Education Programme (EEP) hmanga buatsaih a ni a; leilung leh a chhunga awmte humhalhna tura kalpui mek Mission LIFE tihhlawhtlinna atana tih a ni. Resource person Lalsawmliana Sailo, KVIB executive officer-in khuai khawi dan a zirtir.

Khuaite chu leilung, mihring leh nungchate inbûk tâwk taka awm zelna tura thil ṭangkai a nih avangin khuai khawi zirna hi buatsaih a ni a; training-a tel zirtirtute hnenah khuai khawina atana hmanraw mamawh chi hrang hrang pek a ni a; eco-club awmna zirna-in bul hmun remchangah khuai báwm hûngin, eco-club zirlaite'n zirtirtute kaihhruaina hnuaiah khuai an khawi dawn a ni.

MPCB chuan EEP hnuaiah Mizorama sikul leh college hrang hrang eco-club 2,000 dawn an din tawh a, eco-club member zirlaite hnenah Mission LiFE chungchang zirtir ṭhin a ni.