Minister-in ṭan la turin science zirtirtute chah

Science Teachers' Asso-ciation Mizoram (STAM) chuan nimin khan Synod Con-ference Centre-ah General Conference vawi 37-na an hmang a, Education minister Dr Vanlalthlana'n hmanpuiin, ṭan la zel turin science zirtirtute a chah.

STAM inkhawmpuiah hian Aizawl chhung leh páwn aṭangin an member-te ṭhahnem tak an tel a; state award to teachers dawngtu Zothanliana leh C Lalhrilliana te chawimawina hun hman a ni. STAM adviser Rev. Chuauṭhuama sûnna hun an hmang a; artificial intelligent chungchang zirho a nih bakah, hruaitu thar an thlang bawk.

Minister Dr Vanlalthlana chuan, zirtirtute'n tunlai thiamna changkang zawk nen zirtirna an kalpui a ṭul thu leh artificial intelligent hman thiam a pawimawh thu a sawi a, "Company-te pawhin mi tlem zawk ruaiin thawh chhuah tam zawk an nei thei a, technology chhuak thar zel hmang thiam nih a pawimawh," tiin, zirtirtute chu ṭan la zel turin a fuih.

Dr Vanlalthlana chuan, zirlaite'n thil thar ngaihtuah chhuah thiam theihna an neih theih nan chher an ngai tih sawiin, "Zirlaite hian an thil zirah zawhna an neih tam theih nan fuih an ngai a, zawhna an neih tam hian an ngaihtuahna a vak zau ṭhin a ni," a ti.

STAM inkhawmpuiah hian Education consultant Rev.Dr K Thanzauva pawhin thu a sawi a ni.