Poshan Panchayat Meeting neih a ni

Women & Child Development (WCD) directorate chuan Rashtriya Poshan Maah (National Nutrition Month) pualin nimin khan Synod Conference Centre-ah Poshan Panchayat Meeting an buatsaih a, Aizawla local council hrang hrang aiawhte telin, Poshan Maah leh naupang leh nu hriselna atana ei tur ṭha pawimawhnate an zirtir.

WCD director Vanlalpianpuii chuan WCD kalphung leh hnathawhte a sawifiah a; Poshan Panchayat chu sorkar laipuia Ministry of Women & Child Development-in nei tura a rawn tih anga buatsaih a nih thu sawiin, khawtlang hruaitute nen thawhhona ṭha zawk neih a nih theih nan Poshan Panchayat Meeting chu hlâwk taka hmang turin a chah a ni.

WCD deputy director Zoramthangi Chhangte-in Integrated Child De­velopment Services (ICDS) chu anmahnia kal mai thei an nih loh avangin, veng tinah LC hnuaia coordination committee din tur a nih thu a sawi a; coordination committee chu engkima sûlsutu pawimawh a nih avang leh ICDS hnuaia anganwadi centre-te chu khawtlang tana chhenfâkawm leh hlawhtling a nih theihna turin khawtlang hruaitu LC-te an pawimawhna thu a sawi bawk.

Rashtriya Poshan Abhiyan (National Nutrition Mission) nodal officer Zonunpari Sailo chuan Poshan Maah hman chhan, a tum leh hman tawh dante a sawi a, "Tun kum Poshan Maah chhung hian naupang chak lo leh ṭhan ṭha lo zualte zawn chhuah a, enkawlna uluk zawk pe turin beihpui thlak mek a ni," a ti a; an hmalaknaah khawtlang hruaitute ṭawiawmna an mamawh thu a sawi. Inkhawmah hian WCD chuan local council tin hnenah Poshan Maah t-shirt an pe a ni.