Pathianin MNF kaltlangin Mizo chhan chhuah a duh - R Tlanga

MNF party chuan nimin khan Mizo Hnam Rûnah chhung inkhawm an hmang a; thusawitu R Tlanghmingthanga, minister hlui chuan, Pathianin MNF kaltlangin Mizo hnam chhan chhuah a duh niin a sawi.

R Tlanghmingthanga chuan, Mizo hnam leh MNF a inzawm tlat nia sawiin, "Pathianin kan hnam hi MNF kaltlangin chhan chhuah a duh a ni. Kan hnam hi a dam tur a ni a, kan sakhua pawh a him tur a ni. Kan hnam hi intodelh turin ke kan pên a ngai," a ti.

Mizo hnam chu party duh dana kaihhruai mai chi a ni lo tih sawiin Tlanghmingthanga chuan, "MNF hi eizawn nana hman chi a ni lo a, hrehawmna leh tawrhna leh thihna hial pawh tawh theihna hmun a ni. Kan mimal duh dan tipuitling tura Hnam Rûn hi kal tur a ni lo. Mi tê ber aṭanga a lian ber thlengin ram leh hnam tan kan kal tur a ni," a ti bawk.