JB College campus-ah RSETI hawng

J Buana College campus-a Rural Self Employment Training Institute (RSETI) din thar chu Septem-ber 12, Ningani khan minis-ter Lalrinpuii'n a hawng.

RSETI hi sorkar laipuia Ministry of Rural Development hnuaia thingtlang ṭhalaite'n kutkawiha eizawnna an neih theihna tura thiamthil inzirtirna hmun a ni a; JB College campus-ah RSETI din thar hi HDFC Bank-in India rama an kalpui hmasak ber tur a ni.

Sorkar laipuia RD Ministry chuan India rama bank zawng zawng chu RSETI hmangin ṭhalai hna nei lote hnenah mahni kutkawiha eizawnna neia an intodelh theihna tur zirtir a, kawng kawhhmuh turin a ti a; chumi ang chuan thingtlanga hna thawh tur nei lote awm tamna hmun 598-ah bank hrang hrangin RSETI an din tawh.

Lungleia HDFC RSETI-ah hian puanṭhui, beauty parlour management leh computer hardware & networking zirna kalpui a ni a, zirlai 98 an awm mek. Zirlaite chu hmanraw mamawh - uniform, chenna tur (hostel/boarding) leh ei in leh an zirna sensote a thlawn veka pek a ni.

Minister Lalrinpuii chuan, sorkar hna ringawt ûm lo a, mahni kutkawiha ding thei tura thiamthil zir a pawimawh thu leh uar zel a ṭul thu a sawi a, "Mizoramah sorkar hna chu hna ṭhaa ngaih a nih laiin, mi tin thawh vek theih a nih lo a, ram chhung ei leh bar intodelhna leh hmasawn nan sorkar hna chauh ni lo, kut hnathawh leh sumdawnna te, eizawnna hrang hrang kalpuitute an pawimawh vek a ni," a ti.