Deputy Speaker-in tablet a sem

Samagra Shiksha, Kolasib district chuan nimin khan Kolasib BRC Hall-ah NIPUN Bharat Awareness Programme leh tablet semna hun an buatsaih a, Assembly deputy speaker Lalfamkima, Kolasib bialtu MLA-in a hmanpui.

Inkhawm hi Kolasib DEO leh Samagra DPC Vanlalchhana'n a kaihruai a; Deputy Speaker-in Kolasib district-a primary school leh middle school 128 hnenah zirlaite'n an zirnaa an hman tur leh sikulin an activity report an pekna hmanrua atan tablet a sem. NIPUN Bharat hnuaia Mizoram pum huap music video siam intihsiaka pathumna Kawnpui P/S-III hnenah lawmman a hlan bawk.

Lalfamkima chuan, sorkar laipui hmalakna ṭha takte tihlawhtlingtu ni zel turin zirtirtute a fuih a, "Khawvel changkang zel mila zirna kalpui thiam a ṭul. Internet hmangin zirnaah kan duh ang information kan hmuh theih tawh avangin hman ṭangkai thiam a pawimawh," a ti a; sorkar aṭanga an thil dawnte chu a nih dan tur ang taka hmang tura zirtirtute a chah a ni.

Awareness programme-ah hian mithiamte'n NIPUN Bharat chungchanga thil pawimawh hrang hrang ziritirtute an hrilhfiah a ni.