KHAWTHLIR

Thisen pe

Nimin khan Salvation Ṭhalai Pawl, Aizawl area chuan Civil Hospital, Aizawl tan thisen unit 29 an pe a, petute mipa 21 leh hmeichhia pariat an ni. Bilkhawthlir Higher Secondary School zirlaite'n Kolasib District Hospital tan thisen unit 26 an pe a, petute mipa 15 leh hmeichhia 11 an ni. Pentecostal Youth Department (NEI), Thenzawl Bial pawhin Thenzawl Field Veng UPC kohhran hall-ah thisen pek huaihawtin, Serchhip District Hospital tan thisen unit 20 an pe a, petute mipa 16 leh hmeichhia pali an ni.

Kuhva phurh khap

Kolasib DC Robert C Lalhmangaiha chuan Bharatiya Nagarik Surakha Sanhita, 2023 Section 163 thlawhchhanin thupek a chhuah a, Kolasib district-ah dan phal loh kuhva rah phurh leh paltlangtir khap a nih thu a puang. "Kolasib district chhungah mi tu mahin ram pawn aṭanga lakluh kuhva (Burmese arecanut) dah khawlna kudam an siam tur a ni lo," a ti a; kudam awm sate pawh Kolasib SP-in kalhin, khawih chêt phal a nih loh thu a tarlang bawk.

MGNREGA Social audit ṭan

Mizoram Society for Social Audit and Transparency hnuaia social audit unit-te chuan September 12, Ningani aṭang khan an director C Laltleipuii kaihhruaiin Serchhip district-ah MGNREGA social audit an ṭan a, September 24, 2024 thleng an nei dawn. Social audit neihna atan hian Serchhip district-a khaw 18 thlan a ni a, khawtlang hruaitute - VC, YMA, MHIP, MUP leh MJA aiawhte'n an tel a ni.

MOVCD-NER sawiho

Serchhip District Monitoring Committee for Mission Organic Value Chain Development for North Eastern Region (MOVCD-NER) chu nimin khan an chairman Paul L Khuma, bawrhsap hoin an ṭhukhawm. Chhingchhip leh a chhehvel khuate bakah, East Lungdar RD Block-ah MOVCD-NER thawh lina kalpui a nih dawn thu leh kut hnathawktu 500 vel sapthei chìntir a nih dawn thu tarlan a ni.