Covid-19: Mizoram dinhmun Hri vei mi 43 hmuh belh a ni
September 27, Pathianni khan Mizoramah mi 1,226-te swab sample endik aṭangin Covid-19 vei mi 43 hmuh chhuah a ni a, nimin khan mi 44 chhuahtir an ni thung.
Covid-19 vei September 27-a hmuh chhuah mi 43 zinga mi 36 chu ZMC laboratory-a hmuh chhuah a ni a; Lunglei Civil Hospital laboratory-ah mi paruk leh Rapid Antigen Test (RAT) hmangin Aizawlah mi pakhat hmuh chhuah a ni bawk.
Nimin khan hmun hrang hrang aṭangin Covid-19 vei dam tawh mi 44 chhuahtir an ni a; Bawngkawna Gilead Special School CCC aṭangin mi 23, Zokhawsang CCC aṭangin 17, ITI Venga Finance building
CCC aṭangin pahnih, Thingdawl CCC leh Khawzawl DCHC aṭangin mi pakhat ve ve an ni.
Mizorama Covid-19 vei hmuh tawh mi 1,908-te chu mipa 1,563 leh hmeichhia 345 an ni a; an zinga mi 1,417 (74.27%) an chhuak tawh a, enkawl mek mi 491 (25.73%) an awm. La chhuak lo zingah hripui an vei tawh lo (negative tawh) eng emaw zat an awm bawk.
September 27 khan Mizoramah mi 1,226-te swab sample endik a ni a; ZMC-ah 854, Lunglei Civil Hospital-ah mi 30 leh RAT hmangin district paliah mi 539-te sample endik a ni. September 27, Pathianni khan ZMC Covid-19 Laboratory-ah RT-PCR hmangin hripui vei mi 36 hmuh chhuah a ni a, mipa 33 leh hmeichhia pathum, Aizawl district-a mite vek niin, September 21, 22 & 23-a sample lakte an ni tih sorkar thuchhuahin a tarlang.
ZMC-a Covid-19 positive hmuh thar zinga panga chu Mizoram chhunga kái chhâwng (local positive contact) an ni a, mi 31 chu state pawn aṭanga rawn lut an ni thung. Local positive contact-te chu - Aizawl Venglai mi pakhat, Bawngkawn South mi pathum leh Zonuam mi pakhat an ni.
State pawn aṭanga rawn lut Covid-19 vei zingah Assam Rifles mi leh sa mipa 10, BSF sipai 18 leh Border Roads Organisation (BRO)-a mipa pakhat an tel a; mi pahnih chu civil mi hmeichhia pahnih kum 24 ve ve, Noida leh Delhi aṭanga rawn kîrte an ni. State páwn aṭanga rawn lutte hi quarantine centre-a awm lai, Covid-19 symptom lang lo vek an nih thu sorkar thuchhuahin a tarlang.
Lunglei Civil Hospital laboratory-a Covid-19 positive hmuh tharte chu Assam Rifles mi leh sa paruk an ni a, an vai hian tun hnaia state páwn aṭanga rawn lut an nih loh avangin Mizoram chhunga kái chhâwnga ngaih an ni. Hripui an kai rinhlelh sa an nih rualin, symptom an nei lo.
September 27 vêka RAT hmanga hripui vei hmuh chhuah chu Durtlanga hmeichhia kum 19-a upa a ni a, taksaah harsatna a nei (symptom a lang) nia tarlan a ni.