SRS-in ruihhlo ti mi 53 an khâwm Fimkhur takin kan kal dawn: SRS

YMA-in ruihhlo do tura a din, Supply Reduction Service (SRS) member-te chuan a vawi khatna atan April 11, Inrinni zing khan Aizawl khawpui hmun pathumah ruihhlo leh a khawihtute vaiin an hnatlang a; ruihhlo khawih mi 36 an khawm a, nimin zingah mi 17 an khawm leh. SRS hotute chuan, SRS chu fimkhur taka an kal dawn thu leh an sûlhnû pawh tun hma aia a thianghlim tur thu an sawi.

Central YMA Kumpuan Com­mittee chairman Vanlalrema Ro­khum, CYMA vice president-in Vanglaini palai a hrilh danin, SRS member-te hian Electric Venga Power House bul velah te, Zodin Square, Vanapa Hall bul leh Treasury Square velahte ruihhlo zuar leh khawihte an vâi a; ruihhlo khawih ṭhin mi 36 khawmin, Central YMA Hall-ah an hruai.
SRS member-te hi New Market leh a chhehvel te, Zodin Square leh Treasury Square velahte nimin zing khan ruihhlo leh a khawihte váiin an thawk chhuak leh a; mi 17 an khawm leh a ni.
SRS hotute chuan an mi khawm­te'n an awmna veng nia an sawi YMA branch hruaitute biain, an veng mite chu hruai haw a, an chhungte hnena hlân turin an ngen a; chutiang chuan mi ṭhenkhat chu an hawtir a ni. Ruihhlo khawih an khâwmte chuan CYMA ruihhlo ngaite puala camping a siam hunah luh an intiam vek a ni.
Mi 36 an khawmte hi heroin khawih vek an ni a, an ruihna tur zuar te, ruihhlo leina atana mahni inzuarte niin, mahni ina riak loa khawlaia riak mai maite an ni hlawm. Awmna mumal nei lo leh Aizawl khawpui pawn lam mite chu police kutah an hlan zel dawn thu an sawi.
YMA Kumpuan Committee chairman chuan, Mizoram hmun hrang hrangah heroin man a tlakhniam avangin heroin rui ṭhin an pung tih sawiin, "Ṭhenkhat chu chhungkaw dinhmunin a zir loh vanga ruihhlo tite an ni a, ruihhlo khawih rin aiin an tam a, sikul kal laite zingah pawh an tam hle," a ti.
Vanlalrema Rokhum chuan, mahni inzuar zingah tleirawl tê tê pawh an awm thu leh anmahni dàwrtute pawh mi pangngai leh rin loh tak takte an nih ṭhin thu a sawi. KS phur ṭhin taxi-te chu an hnawksaka an ngaih thu sawiin, "KS phur ṭhinte hi chu stand-a dintir loh a ṭha mai thei," a ti.
SRS-in hma an lakna turah, kohhrante nen ṭang rualin camping buatsaih an tum tih an sawi a, "Mizoram Synod nen thawh dun dan tur kan ngaihtuah mek a, kan hlawh­tlin ngei kan beisei," a ti a; ruih­hlo tite chu an duhthlanna tel loa home-a dah ngawt an duh lo tih a sawi.
YMA Kumpuan Committee chair­man chuan, ruihhlo ngaite'n nun kawng dik an zawh theih nana kaihhruai an tum a, intihlauhawm zawnga kal an duh loh thu sawiin, "Tuna SRS hi tun hma angin kan kal chak kher lo ang a, mahse kan sûlhnû a thianghlim zawk ang. Chêt sual palh theihna lakah kan inveng hle a ni," a ti.
SRS din chhan Vanglaini palai zawhna chhangin Vanlalrema Rokhum chuan, mipui ngenna a nasat vang te, ruihhlo ti nu leh pate ngenna vang te, Aizawl khawlai ṭawp thenfai duhna vangte a nih thu a sawi a; SRS atan Central YMA-in sum ruahman lawk a nei lo a, rinnaa an kal mai rih thu te, judicial officer-te leh Home Minister-te la titipui an tum thu a sawi.
SRS-ah hian member 36 an awm a, CYMA treasurer J Lalsai­lova chu chairman a ni a, vice chairman-ah K Lalthankima leh secretary-ah RL Zomawia-te an awm. Member zinga a tam ber chu YMA Central Executive Committee member-te an ni a, Kumpuan Committee aṭangin member an inruat bawk.