KHAWTHLIR

Thisen pe
Sateek Pastor Bial KṬP chuan, an bial diamond jubilee pualin Inrinni khan Sateek Kohhran hall-ah blood donation camp an huaihawt a, Synod Hospital tan thisen unit 69 an pe a, a petute mipa vek an ni. Inrinni vek khan Lunglei Civil Hospital-ah Lunglei Bazar Corp SAY member mipa 15 leh hmeichhia pathumte'n thisen unit 18 an pe a, Chawngte Area Students Union member mipa 14 leh hmeichhia palite'n thisen unit 18 an pe bawk.

Centenary lawm
Kulikawn Presbyterian Kohhran chuan an kum 100-na, centenary chu nimin khan an lawm ṭan a, a ṭanna programme hi April 19 thleng an nei ang. Centenary lawmna khârna programme chu July 17-20, 2015 chhungin an nei dawn bawk. Centenary lawmna programme-ah hian an kohhrana láwi tawh zawng zawngte tel vek turin an sáwm.

In kâng
Phunchawng venga Lian­zama in, Assam type chu nimin chhun khan a kâng a, bungrua chuh hman lohin a kâng ral vek. In kan chhan hriat chian a ni lo a; mihring thi leh hliam an awm lo.

Lok Adalat thu
Kolasib District Lok Adalat chu Inrinni khan an ṭhu a, thubuai 17 an ngaihtuah zinga pathum an chingfel. Thubuai an chinfel zinga leiba inṭhìnna aṭangin Rs. 90,500 hmuh a ni a; thubuai an ngaihtuah dangte chu - ram inchuh buai, pawisa ba inṭhìnna, chhungkua inhriatthiam lohna leh accident claim-te a ni.

Thiin chhar
April 10, 2015 zan dar 7 vel khan College Veng leh Bethlehem Vengthlang inrìna luikawrah Lalbiaksanga (48) s/o Lalluaia, College Veng ruang chhar a ni. Thu dawn danin, Lalbiaksanga hi Bethlehem Vengthlanga Sahuan hlui bulah a inhlawh ṭhin a, April 9 khan a haw lo a, an zawn hnuah April 10 zanah thiin an hmu ta a ni. A ruang hi tuiah a inchiah a, a taksaah mi dang kutthlâkna hnûhmá hmuh a ni lo.

Hnam dang dap
Khatla branch YMA chu Inrinni zing khan an veng chhungah dan loa hnam dang sumdawng leh Mizo hming hawha sumdawngte dapin an hnatlang a; a hmaa MZP nen ṭangruala dawr khâr tura an hrilh tawh, hawng lehte chu khâr turin an hriattir leh a ni.

BCM-in tanpui
Mizoram Baptist Kohhran hnuaia Relief and Development department chuan, tun hnaia thli, ruah leh rial vanga chenna in chhia leh thawm ṭhat ngaite ṭanpui nan Rs. 1,42,000 a pe chhuak. Heng sum hmang hian Bungtlang leh Buarpui biala chhiat tâwkte ṭanpuina pek a ni.

Tuitla ruang hmu
April 9, 2015-a Chhimtuipui, Liapha bula tla L Bisa (39), Rualkual khaw ruang chu Inrinni zing dar 8:40 vel khan hmuh a ni. Ruang zawngtute'n a ṭul anga an hman atan Lawngtlai DC huan Rs. 20,000 leh silpauline pathum a pe a, LADC CEM V Zirsanga'n Rs. 4,000 leh silpauline pahnih a pe bawk.

Heroin man
Champhaia Excise & Narcotics department hnathawkte chuan, Inrinni zing dar 8 khan Zokhawtharah heroin gram 34 leh a neitu, Keihleitial (49) w/o Thalthandaw, Khawmawi, Myanmar nia inchhál an man. Heroin hi Myanmar aṭanga a lak luh a ni.