Ruantlang Mualveng-in vote thlak tum lo

Champhai district-a Ruantlang Mualveng chuan, April 30, 2015-a village council inthlan turah V/C hran pek an nih loh avangin vote thlak loh an tum.

Ruantlang Mualveng khawtlang hruaitute hnen aṭanga Vanglaini thu dawnin, Ruantlang Mualveng hi Ruantlang aṭangin inrêlbàwlna hranpa neiin kum 1977-ah an awm ṭan a, kohhran, YMA leh pawl dang dangah an indang tawh a ni. V/C pawh a hrana neih an duh a, mahse sorkarin an ngenna an tihhlawhtlinsak loh avangin V/C inthlanah vote thlak loh an rel a ni.

Ruantlang Mualveng khawtlang hruaitute chuan, "Tun hmain V/C hran neih hi kan lo nawr tawh a, kan hlawh­chham a ni. Nikum khan kan nawr leh a, thuneitute'n ṭha takin min chháng a, mahse a hunah V/C hran min pe leh chuang lo," an ti a; V/C pek an nih tak loh avang hian mipui kalkhawm chuan vote thlak loh an tihtluk thu an sawi.

Ruantlang Mualvengah hian chhung­kaw 110 velah voter 350 vel an awm a ni.