PYD-in Blood Donation Week an hmang

UPC (NEI) ṭhalai pawl, Penticostal Youth Department (PYD) chuan October 2-a PYD Social Works Day thleng tur pualin nimin aṭang khan Blood Donation Week an hmang ṭan a, General PYD president Rev. H Lalropuia'n hawngin, thisen pek rûnpui an nei ṭan.

Thisen pek ṭan hmain Week hawnna inkhawm hman a ni a, Rev. Lalropuia chuan, thisen pek rûnpui chu PYD-te'n kum tina an hman ṭhin Social Works Day puala huaihawt a nih thu a sawi a, "Keimahni inchawimawina tur a ni lo a, kan ropuina tur a ni lo; kan Pathian ropui nan, mi dang tana malsawmna kan nih theihna atan a ni," a ti.

Hawnna inkhawm hmanpuitu Association for Voluntary Blood Donation (AVBD) hruaitute pawhin thu sawiin, Mizoramah blood donation week hmang a, chawlhkar khat chhung ruahmanna mumal tak siama thisen pek huaihawt an la awm ngai loh thu an sawi a; PYD hmalakna chu chhuanawm an tih thu sawiin, thisen pek kawngah tha thlah loa ṭang mar reng turin an ngen.

PYD-in Blood Donation Week an huaihawt hi tun kar chhung awh tur a ni a, an din champha October 2-a an hman ṭhin Social Works Day puala buatsaih a ni a, nimin khan thisen pe ṭanin, ni li chhung thisen an pe dawn a ni. Ni li chhung hian Aizawla UPC pastor bial 17-a PYD member-te thisen pek hun mumal takin an ruahman a, Covid-19 léng avangin bial tinte pek ni tur mai bakah, pek hun tur darkar pawh an ruahman nghal a ni.

Nimin bikah Zemabawk North, Hunthar, Mualpui leh Dinthar biala PYD member-te'n thisen unit 72 an pe a, a petute mipa 65 leh hmeichhia pasarih an ni. Vawiin, naktuk leh Ningani-ahte an pe leh ang.

AVBD hruaitute'n blood bank record an tarlan danin, PYD (NEI) hian kum 2019-20 chhung khan Mizoram pumah blood donation camp vawi 19 neiin, thisen unit 458 an pe a, kum 2018-19 khan donation camp vawi 13-ah thisen unit 309 an pe bawk.