MZP-te'n sikul zirlaibu an hâl

MZP chuan English medium school-a General Knowledge subject zirlaibu ‘Fact Finder’ tih chu dik lo tam tak a awm avangin Inrinni khan MZP Pisapui bul, District Education Officer pisa kawtah an hâl.

MZP president Lalhma­chhuana chuan, Fact Finder lehkha­bu chu Trend Setters Book Ltd. siam a ni tih sawiin, Mizoram sorkarin English medium school-a pawl 5, 6 leh 7-te zir tura a tih a nih thu a sawi a, "Dik lo tam tak a awm a, a dik lote kan hmuhchhuah belh zel a ni," a ti a; statistics leh data ṭhenkhat atan kum 2001 an hmang niin a sawi.

Lalhmachhuana chuan, nau­pangte'n lehkhabu ṭha leh rintlak, tunlai ber ber zir se an duh laia leh­khabu rintlak loh an zir tur ṭha an tih loh avangin an hâl tih a sawi a; zirlaite'n lehkhabu ṭha leh rintlak an zir theih nana ṭan la turin sorkar an phût tih a sawi bawk.

MZP president sawi danin, Fact Finder-ah hian India President chu Pratibha Patil tih a ni a, prime minister chu Dr Manmohan Singh tih a ni. Mizorama khawpui hrang hrang hmingah Ṭamdil tihte leh hming dik lo tak tak a awm ṭeuh bawk. MZP hian zirlaibu chu siam ṭhat a nih hma loh chuan zirlaite zirtir lo turin thuneitute an ngen a ni.