YMA-in mi ina lûta thil zawrh an duh lo

YMA sub-headquarters, Serchhip hnuaia Kumpuan Committee chuan thuchhuah siamin, dan loa ram dang mi (foreigner) sumdawngte mi ina lût láwra thil an zuar ṭhin chu mipui himna atan thil ṭha loa an ngaih thu an tarlang. An huam chhunga YMA branch tinte chu ina luta thil zawrh phal lo turin an ngen.

Serchhip sub-hqrs YMA chuan, ram dang mi sumdawngte mimal in hrang hranga lut láwra thil zawrh khap tura YMA branch tinte an ngennaah hian, YMA branch-te chu April 2015 chhung ngeia sub-hqrs. YMA office-ah ziaka report thehlut turin an ngen nghal bawk.

Serchhip sub-hqrs YMA chuan, dan loa hnam dang sumdawng dap chhuah beihpui thlak turin YMA branch tinte an ngen nghal a; tun hnai aṭangin Serchhip bazara BSF mi leh sa, Dawngzawla inkhuarte an zalen lutuk nia sawiin, an ngaimawh thu an sawi a, "Sipai leh civil mite inkarah inhriatthiam lohna a thlen hmain BSF-te chungchang hi DC Juhi Mukherjee hnenah a rang lama thlen ni se, a ṭul chuan thuneitu sang zawkah thlen zui ni se," an ti.

Serchhip sub-hqrs YMA chuan, May 2015 chhungin police lamte nen inthurualin Serchhip khawpui huam chhungah ILP endik beihpui thlak an tum thu an tarlang bawk.