VC leh LC inthlan atan inbuatsaih mek

April 30, 2015-a village council leh local council inthlan turah political party hrang hrangte chu ngawrh takin an inpuahchah a; party ṭhenkhatin thawhho an tum laiin, a mala din tumte an awm bawk.

VC leh LC inthlan turah hian state sorkara rorel lai Congress party chuan thawhpui party nei loin, anmahniin VC leh LC tam zawkah din an tum a, mahse khua leh veng chhunga a remchan dan azirin party unit hruaitute chu party dang nena thawhhona siam an remtihsak. Congress party-in an thawhhopui tur zingah ZNP leh MPC-te an tel a, MNF leh BJP erawh chu thawhpui an tum lo nia thu dawn a ni.

MNF party chuan khua leh veng hrang hrangah unit level-a ruahmanna siam turin an party unit hruaitute chu thuneihna an pe a, a remchan dan azirin party hrang hrang nen an thawkho dawn. MNF general secretary K Vanlalauva chuan, Aizawla LC inthlanah inthlan hmasa aiin an dinhmun a ṭhat zawk an beisei thu leh VC inthlanah pawh inthlan hmasa aiin an chak zawk an beisei thu a sawi.

MPC party pawhin khua leh veng hrang hranga an unit-te chu candidate siam danah leh thawhpui tur zawn chungchangah zalenna an pe. MPC senior vice president Vanlalhlana chuan, candidate an neih theihnaah chuan party dang nen an thawkho dawn a, candidate an neih theih lohnaah erawh chuan party dang candidate an thlawp dawn tih a sawi.

ZNP pawhin candidate siam leh party dang thawhpui chungchangah block leh unit-te chu zalenna an pe. ZNP gen.hqrs hruaitute chuan, MNF nen a tam thei ang berah thawh dun an tum a, MPC nen pawh a remchannaah chuan thawh dun an tum bawk a, BJP nen erawh chuan thawh dunna tur boruak a la awm lo niin an sawi.

BJP pawhin LC leh VC thlannaah candidate a tam thei ang ber dah an tum niin an general secretary K Lalchhanhima'n a sawi a; hmun tam takah party dang nen an thawk dun dawn a, Congress party nen erawh an thawk dun dawn lo tih a sawi bawk.