CM leh FOCUS hotute inkâwm

Chief minister Zoramthanga chuan nimin khan Fostering Climate Resilient Upland Farming System (FOCUS)-a hmarchhak biala hotute a kâwm a, an hmalakna leh kal zel dan tur a sawipui.

Chief Minister chuan, ei leh bara Mizoram a intodelh theih dan tur ngai pawimawh hmasa chunga theihtawp chhuah tur leh, ram tan ṭhahnemngai taka hma la chhunzawm zel turin FOCUS member-te a chah.

FOCUS hi United Nations Organisation hnuaia agency pakhat International Fund for Agricultural Development (IFAD) hnuaia project a ni a; sik leh sá inthlak nasa global warming leh climate change khawvelin a tawn mek hrûla hma la tura din a ni.

Sik leh sa inthlak danglam nasain mihringte eizawnna pui, thlai thar leh tlang ram lo neih a tihbuai mekah loneitute kawng kawhhmuh a, technical guidance pe turin FOCUS din a ni.

June 28, 2017 khan Mizoram sorkar leh IFAD Project Design Completion Mission chuan sawiho ṭanin, January 25, 2018-ah project agreement ziah a ni a; district pali - Champhai, Kolasib, Serchhip leh Mamit district a huam a, khaw 272-ah hma an la mek. IFAD aṭangin FOCUS Project atan hian loan US dollar nuai 353 ruahman a ni.