Covid-19 vei hmuh thar zingah Mizorama kái chhâwng mi 11

September 27, Pathiannia Covid-19 vei hmuh chhuah mi 43 zingah Mizoram chhunga kái chhâwng mi 11 an tel a, civil mi panga leh Assam Rifles mi leh sa paruk an ni. An zingah Covid-19 symptom nei pakhat a awm a, mi dang zawngin an nei lo.

Hripui vei hmuh thar zinga Durtlang nula pakhat, kum 19 chuan Covid-19 symptom a nei a, hmanhmawh thila Rapid Antigen Test hmanga endik a ni. Zonuama mipa kum 31 mi chu Vishal Megamart-a kal, chuta ṭanga hripui kai ta nia hriat a ni. Sorkar thuchhuakin Covid-19 vei hmuh thar zinga Armed Veng South mi anga a tarlan, police mipa kum 44 mi chu Aizawl Venglai mi a ni a; amah hi 1st Bn MAP-a awm, MI Room-a positive hmuh tawh kaihhnawiha kai nia hriat a ni.

Bawngkawn South anga tarlan mi pathum zinga pahnih (mipa leh hmeichhia) chu Bawngkawn mi an ni a, contact tracing-ah Bawngkawn South aṭanga chhui a ni thung. Mipa dang pakhat chu Nisapui khua, LBS Suzuki-a thawk a ni a, swab sample lâk hmain an khuaah a haw a, Aizawla a lêt leh hnuah, September 20 khan sample lâk ni mah se, a tûkah an khuaah a haw leh nghal a ni. An pathum hian LBS Suzuki contact tracing-a sample test an nih thu, LTF hruaitute chuan an sawi.

Mizoram chhunga kái chhawng nia hriat dang parukte chu Lungleia awm Assam Rifles mi leh sa vek an ni a; anni hian tun hnaiah Mizoram an chhuahsan lo a, Mizoram chhunga kai nia hriat niin, hripui an kài rinhlelhna a awm sa niin sorkar thuchhuahin a tarlang.