Office of Profit palzûta inpuhnaah Larsapin sorkar sawifiah a nghâk
Mizoram Pradesh Congress Committee (MPCC)-in MLA palite Office of Profit palzûta an puhna chu sawifiah turin Governor PS Sreedharan Pillai-a'n Mizoram sorkar a hriattir a, sorkar sawifiah a nghâk mek.
MPCC chuan November 17, 2020 khan MLA pali - Dr Vanlalthlana (ZPM), Prof. F Lalnunmawia (MNF), L Thangmawia (MNF) leh Dr Vanlalṭanpuia (MNF) ten Office of Profit an palzût nia an ngaih thu Governor hnenah an thlen a, a ṭul anga hma la turin an ngen a ni.
Vanglaini palai zawhna chhangin Governor secretary K Lalthawmmawia chuan, MPCC-te ngenna thehluh chu bawhzui a nih thu a sawi a, "Dan angin Mizoram sorkar sawifiah tura tih a ni a, chu chu la nghah ni," a ti. Mizoram sorkar insawifiahna aṭangin Governor-in a ṭul angin hma a la zui dawn tih a sawi.
MPCC chuan, MZU danin a phal angin teaching staff-te'n civic right an nei tih an tarlang a, "Amaherawhchu, MP/MLA thlan tlinte chuan university-ah emaw, state legislature-ah emaw an duhna zawk zawkah hlawh an la thei ang, tih a ni. MLA palite hian MZU aṭanga hlawh la reng chungin MLA Legislature Secretariat aṭangin MLA-te tana hamṭhatna an la vek a ni," an ti.