KHAWTHLIR

GAD chuan nimin khan notification chhuahin, October 12, 2020 aṭanga February 19, 2021 inkara Mizoram sorkar hnathawkte pisa kai hun tur a tarlang. Pisa kai hun tur chu, Mizoram leh hmarchhak state-a Mizoram House-a thawkte tan zing dar 9 aṭanga tlai dar 4 thleng a ni ang a, Mizoram House dang zawnga thawkte tan chuan zing dar 9:30 aṭanga tlai dar 5 a ni ang.

Vawiin chawhnu dar 2 hian Aijal Club-ah Zoram Peoples’ Movement (ZPM) Val Upa Council-in ZPM hruaitu thar tur atana an ruatte chu puan a ni dawn. Tuna ZPM hruaitu ni mekte term lailâwk chu August 10, 2020 khan a tàwp a ni.

MZP headquarters, Champhai chuan thuchhuah siamin, C Lallianpuia s/o Tlangkhuma (L), Champhai Venglai, September 26, Inrinniah hmeichhe naupang kum 5 mi chunga mawi lo taka a che chu an dem thu an tarlang a, “Dan anga na taka hrem ngei turin thuneitute kan phut a, a thawhna School Education department pawhin suspend thuai turin kan phût a ni,” an ti.

State Referral Hospital-ah Covid-19 vei vangin mi 23 enkawl mek an ni a, an zinga pahnih chu nimina dah luh an ni. SRH-ZMC Bulletin tarlan danin, hripui vei zinga pahnih chu ICU-ah awmin, hma an sâwn a, Isolation Ward-a awm mi 20 leh NICU-a awmin harsatna an nei lo.

Chief minister Zoramthanga chuan nimin khan Zarkawt community hall sak mek a hmunah a tlawh a, hna thawh dan a enfiah. Chief Minister hi Zarkawt Local Council hruaitute’n an ṭawiawm a ni.

Nimin khan 2nd National Conference of Society of Krishi Vigyan, 2020 neih a ni a, Kolasib KVK-a head Dr Michelle C Lallawmkimi, senior scientist hnenah Best Women Scientist of the Year 2020 Award hlan niin, Mizo zinga hmasa ber a ni. Thu dawn danin, Dr Michelle C Lallawmkimi hian agriculture, horticulture, animal science, agro-forestry, soil science, plant protection leh home science lamah a thawh ṭhat avangin award hi a dawng.