World Rabies Day hman a ni

Nimin, September 28 kha World Rabies Day a ni a, Mizoram hmun hrang hrangah hman niin, a thlàwnin ui hri danna rabies vaccine hmangin ui eng emaw zat an chiu. Day thupui chu, 'Inlungruala thawkhoin hri danna hmanga ui a hri nuaibo' tih a ni.

Aizawlah chuan World Rabies Day pualin AH&Vety department huaihawtin Veterinary Polyclinic Hospital-ah hman a ni a, AH&Vety director Dr Hmarkunga'n hmanpuiin, official, People for Animal Protection Society hruaitute leh ui neitute an tel.

Siahaah chuan DVO complex-ah hman a ni a, DVO Dr Sahlu Khaila chuan, ui a hri danna laktir chu ui neitute mawhphurhna leh tihmâkmawh a nih thu sawiin, "Kum 2030 ral hma ngeiin khawvel aṭangin ui â hri ûm bo tum a ni. Ui vulhtu zawng zawngin kan mawhphurhna ṭheuh kan hlen chuan kan tihlawhtling thei ang," a ti.

Champhaiah chuan World Rabies Day pualin AH&Vety complex-ah hun hman niin, DVO Dr B Zonghinga'n ui a hri nuaibo a nih theihna atan department-in theihtawp chhuaha hma a lak thu a sawi.

Kolasib-ah chuan District Veterinary Hospital-ah hman a ni a, CVO Dr Zothanmawii chuan, ui a hri ûm bo turin ṭan rual a ngaih thu sawiin, "Ui vulhtute'n a hun taka vaccine lâk an ngaih pawimawh a ngai a ni," a ti.

Serchhipah chuan District Veterinary Hospital-ah hun hman a ni a; DVO Dr C Zarzokima chuan, ui a hri chu natna hlauhawm tak, schedule-I a nih thu sawiin, "Ran leh mihring tan pawh thihpui theih natna hlauhawm a ni," a ti a, natna lakah mi tin an him a, an inven thiam theih nan kum tin khawvelah World Rabies Day hman ṭhin a nih thu a sawi.

Mamitah chuan AH&Vety Hospital-ah World Rabies Day hman a ni a; DVO Dr RL Ṭanpuii chuan, ui a hriin thisen lum nei ran zawng zawngah natna a thlen theih thu sawiin, "He hri vei ran leh mihringte dam chhuah theihna chance a tlem. He natna ṭihbaiawm tak laka kan him zawk nan ui vulhtute'n ṭan kan lâk a, kan fimkhur a ṭul hle," a ti.

Ui a (â) hri avang hian khawvelah kum tin mi 60,000 vel an thi ṭhin a, mihringin a kaina hnár ber chu ui seh aṭangin a ni. He natna do tur hian WHO, FAO leh World Organisation for Animal Health (OIE) te, India ramah chuan Animal Husbandry leh Ministry of Health-te One Health Programme atan thawkhoin, ui a hri donaa hmalak dan tur Strategic Action Plan duan mek a ni.