NH chhe lutuk vanga lirthei táng a tam; Tuialhthei phurtute'n tlân rih loh an tum

National Highway no. 6 kawngpuia Kawnpui leh Sairang inkar a chhiat êm avangin Mizoram mamawh phur lirthei liante tan tlân a harsa hle a, lirthei eng emaw zat a táng mek. Kawngpui chhe lutuk avang hian tuialhthei phur lirtheite chuan naktuk Thawhlehni aṭangin tuialhthei phurh rih loh an tum.

Thu dawn danin, hun eng emaw ti aṭang khan Kawnpui leh Sairang inkar kawng a khuar chhe tawh a, tun hnaiah chhe nasa zualin, Mizoram mamawh phur lirthei tam tak an táng a, chawlhkar khat dáwn lai tángte pawh an awma sawi a ni. Kar liam ta khan truck ṭhahnem tak an tangkhang a, hmun ṭhenkhatah chuan kawng chhiaa truck tángte chu excavator-in a nawr chhuak ṭhin.

NH kawngpui chhiaah truck tam tak an tàn bakah hian, Assam lam aṭanga Mizoram mamawh phur tur truck-te Mizoram kawng chhia avangin an tlân ṭha duh lo a; hei vang hian Mizoramah bungrua lut a tlem phah. Tuialhthei phurh luh a tlem a, filling station/ petrol pump ṭhenkhat chuan mipui náwlpuia hralh chhuah tur an nei tawh lo.

Vanglaini zawhna chhangin All Mizoram Petroleum Dealers Association (AMPEDA) president K Lalnghakliana chuan, Inrinni zan leh Pathianni zing lam khan tanker ṭhenkhat chuan Aizawl lam an pan theih rualin, tanker la táng eng emaw zat a awm thu a sawi a; tanker la tángte chu vawiin (Thawhṭanni) hian a hmunah tlawh an tum thu a sawi bawk.

Tuialhthei phurtu, Mizoram Oil Tanker Driver Association (MOTDA) leh Petroleum Entrepreneurs’ and Transporters’ Union of Mizoram (PETUM) chuan, naktuk September 17, Thawhlehni aṭangin tuialhthei phur lirthei (tanker)-te kawng chhe lutuk avangin an tlan dawn lo tih an puang.

MOTDA leh PETUM hruaitute September 14, Inrinnia Aijal Club-a ṭhukhawm chuan thuchhuah an siam a; "Tuialhthei lak luhna kawng pui ber a chhiat nasat avangin MOTDA leh PETUM chuan lirthei khalhtu leh mipui kan him zawk nan leh, chhiatna nasa zawk pumpelh a nih theih nan Kawnpui leh Sairang inkar kawng chhe zualpuite siamṭhat a nih hma chu September 17, 2024 aṭang chuan oil tanker-te tlan chhunzawmtir tawh loh mai ni se kan ti. Kan tlân theih loh chhunga tuialhtheiah harsatna a awm palh a nih chuan mipui hriatthiamna kan dil e," tiin an tarlang.

Pawl pahnihte chuan, Kawnpui-Sairang inkar kawngpui chu oil tanker tan chetsual hlauhawm khawpa a chhiat thu tarlangin, "Kawng chhiaa tlan luih avang hian petrol leh diesel baw palhin chhiatna nasat tak a thlen theih avang te, tun dinhmunah kawng chhia avang hian oil tanker eng emaw zat chu senso sang taka siam ngai a nih mek avangtein petrol leh diesel lak luh chu a hautak ta hle a ni," an ti.