Thlai 4 man bituk sawi pawr tumna awih lo turin CM-in mipui a chah

Chief minister Lalduhoma chuan, mi taima, hlawhtlin tuma bei tak takte chu a tahtawlin an bánah kaiin an khai chhuah dawn thu a sawi a; thlai pali an thlante hralhna man tur an puan tawhte chu tute'n emaw sawi pawr tum mah se, awih lo turin mipui a chah.

CM Lalduhoma hian September 14, Inrinni khan Chungtlang zaua lozawh a hmanpuinaah thu sawiin, "Mipui taimakna ram, hlawhtlin tuma bei tak tak tamna ram chu ram changkang leh hmasawn an ni zel a, chutiang mite chu a tahtawlin an bánah kaiin kan khai chhuak dawn. Handholding scheme hi tun thla hian hawn hman kan tum," a ti.

Handholding scheme-ah Chief Minister Special Scheme a awm thu sawiin Lalduhoma chuan, "Hmalakna tur azirin Rs 1,00,000 thleng dawn theihna tur a ni a, loan Rs 50,00,000 thleng pûk theihna a awm dawn bawk," a ti a; loan-ah hian sorkar chu guarantor-ah a ṭan dawn thu leh thawk ṭhate chu loan interest sorkarin a tumsak dawn thu a sawi.

Chief Minister chuan, an sorkar flagship programme ang chu India rama kalpui thei awm chhun an nia sawiin, "Mipui sorkar kan nih ang ngeiin tu mah thlei bik nei loin, a ti tak tak tur an nih phawt chuan Handholding scheme hi an dil thei ang. Thlai pali kan thlante kha a rate kan puan ang khan sorkarin support price a pe dawn a, tute'n emaw sawi pawr an tum a nih pawhin lo awih suh u. Sorkar chu a dinna ngaiah nghet takin a ding reng a ni," a ti.

Lalduhoma chuan, Chungtlang khua chu ṭhelrêt chíng khua an nih thu sawiin, "Rubber hi kan ngaih pawimawh avangin CM Rubber Missions kan kalpui ṭan a, in khuaah hian hmalakna tam tak kan nei chho zelin a rinawm," a ti a; minister-te'n an mamawh leh harsatnate a hmun ngeiah an hmu chuan rah ṭha a chhuah a beisei thu a sawi bawk.

Mamit district-a Chungtlang khuaah hian chhungkua 100 vel awmin, chhungkaw 80 velin ṭhelrêt kung 50,000 chuang an nei a; tlang ram lo an zawhnaah hian Land Resources, Soil & Water Conservation minister Lalthansanga, Agriculture & Farmers Welfare minister PC Vanlalruata, Tourism minister Lalrinpuii leh MLA Lalmuanpuia Punte-te pawh an tel a ni.