Mahindra Thar pathum lei tharte CM hman tura lei a ni lo - Police

Mizoram Police chuan thuchhuah siamin, Police department-in Mahindra Thar pathum a lei thar chu Chief Minister hman tura lei a ni lo a, Police department-in chief minister security (police duty)-te hman tura an lei a nih thu an tarlang.

Mizoram Police chuan, Chief Minister chu venhimna khauh bik, Z+ category security pek ngai a nih thu an tarlang a, "Chu mi atana lirthei hman mek an upat tawh avang te, a him tâwk tawh loh avangtein Police department chuan hun rei tak hman zui zel theih tur, a khalhtu leh lirtheia chuang (security officer)-te tan pawha him ṭha ngei a lei a ni. Motor tharte hi Mizoram Police department-in CM security (police duty)-te hman atana lei a ni a, CM hman tura lei a ni lo," an ti.

Police tarlan danin, Mizoram CM pilot motor pahnih hman ṭhin chu Gypsy a ni a, escort motor atan Bolero leh tail car atan Gypsy hman ṭhin a ni. Chu'ng lirtheite chu a upa ve tawh a, a ṭâwng tawh hle hlawm. Tun hnaia CM zinnaah ṭum thum a chhia a, ṭum khat phei chu escort motor chu Aizawlah hnuh haw a ngai a ni.

Ṭum thum a chhiat tawh avang leh Gypsy-te chu company-in an siam chhuah tawh loh, anti-lock braking system nei lo, power steering ni bawk si lo a nih avangin thlâk a ngai a, Mizoram leilung ngaihtuahin 4WD thova thlak a ngaih avangin Police department chuan Mahindra Thar an lei ta a ni.