Halpuah/halmawiah sorkar khauh a tum: 'Theihtawp kan chhuah dawn' - Home Minister

Home minister K Sapdanga chuan, Krismas leh kum thar vuakvêt leh Puja vuakvêta hâlpuah leh hâlmawi khap chungchangah sorkar a khauh dawn thu a sawi a, "Theihtawp kan chhuah dawn," a ti.

Home Minister hian September 14, Inrinni khan a inah thuthar thehdarhtute a kâwm a, "Tun hma lamin hâlpuah hâl lo tura kan inngenna hlawhtling zo lo ṭhin mah se, kumin Krismas, kum thar leh puja vuakvetah chuan a hlawhtlin theihna turin kawng hrang hranga theihtawp chhuah tum a ni," a ti a, a hlawhtlin ngei an beisei thu a sawi.

Kum danga an lo hlawhtlin loh ṭhin chungchangah K Sapdanga chuan, "Khap thu puan tlai lutuk vang te, ram puma ṭan rualna ṭhat tawk loh vang te, khapna dan bawhchhiate hremna a nat tawk loh vangte a ni ṭhin. Kuminah chuan September 9-ah khap thu rel a ni a, zâwm tura inngenna thu uar taka puanzar zui a ni. Khapna thupek zâwm lote hremna pawh khauh taka kenkawh ngei tum a ni," a ti.

Home Minister chuan, khapna thupek chu BNSS Section 163 hmangin district magistrate-te'n an chhuah dawn tih sawiin, "Thla ruk chhunga rei puan theih a ni tawh. Khapna dan bawhchhiate chu BNS Section 223 hmangin kum khat thleng lung-in tàn leh Rs 5,000 thleng chawitir theih a ni," a ti a; tun ṭuma khapna thupek hian hâlpuah, hâlmawi, meithallawn (sky lantern), silai lem mu nei chite a huam tur thu a sawi.

Sorkarin a khapte chu ram dang aṭanga lak luh, kawl, zawrh leh hmante khap a nih thu sawiin Minister chuan, "Dan bawhchhiate hremna a khauh tak avang leh khauh taka kenkawh tum a nih avangin sorkar hnathawkte phei chu inthiar fihlim ngei tura hriattir an ni. Thil khapte phurtu motor chu document hren te, driving licence tihtawpte thlengin hrem an ni ang," a ti.

K Sapdanga chuan, khapna thupek zâwm a, phur lut lo tur leh zuar lo turin sumdawng zawng zawng ngen leh hriattir an nih thu sawiin, "Thupek hi ngai pawimawh turin mi tin ngen an ni. Hriat loh palh awm lo turin local/village council leh tlawmngai pawl hrang hrangte chu an branch/unit ṭheuhah uar taka aurinna hmanga puangzar tura ngen an ni," a ti a; kohhrante pawh inkhawmnaah uar taka ngenna siam tura beisei an nih thu a sawi.

Tun aṭangin state ramri checkgate hrang hrangah police leh tlawmngai pawlte uluk taka duty tura tih an nih thu sawiin Sapdanga chuan, "Bungraw phur lirtheite bakah private leh sorkar motor-te pawh enfiah ni se tih a ni," a ti.

Home Minster chuan, kum tin hâlphuah leh hâlmawi hâl avangin hri leng a awm ṭhin nia sawiin, "Hâl nasat kum apiangin thi pawh an tam ṭhin tih chhinchhiah a ni. Hâlpuah leh hâlmawi avanga thi an awm lohna tur te, damlote tan phurrit siam a nih lohna tur leh, boruak chhia siam belh a nih lohna turin tanrualpuiah mi tin kan sawm e," a ti.

Zawhna chhangin Home Minister chuan, kum dang aiin kum hlui thlah zan bikah chuan police patrolling an tirh chhuah tam tur thu a sawi.