Mizoram kawng chhia a veiawm - Assam Deputy Speaker
Assam Legislative Assembly deputy speaker Dr Numal Momin chuan, September 14, Inrinni khan Kolasib district a tlawh a, Mizoram kawng chhe lutuk chu a ngaimawh thu leh veiawm a tih thu a sawi.
Dr Numal Momin chuan, Mizoram kawng chhe lutuk a ngaimawh thu sawiin, "A bikin Sairang - Kawnpui - Lailapur inkar kawng chhe lutuk hi state sorkar inthlah dah vang leh he kawng chhawrtu mipui zahlohna lian tak a ni. State dang chu ni se he kawng enkawltu leh mawhphurtute chuan court an hmachhawn tawh ngeiin a rinawm," a ti.
Mizoramin kawng ṭha, damdawi-in ṭha, zirna-in ṭha, kawlphetha hnianghnar, loneitute leh kut hnathawktute'n an thawh mila hlâwkna an hmuh theih nan te, ṭhalaite leh hmeichhiate'n hma lam hun êng tak an neih theih nante Assam Dy. Speaker chuan BJP zawm turin Mizo mipui a sáwm a ni.
Dr Numal Momin chuan, thlai thar hralh chungchangah pawh Narendra Modi sorkar chuan Farmers Producer Organizations (FPOs) 10,000 a din tih sawiin, "Hei hi loneitute hamṭhatna tura din a ni a, state tam takah loneitute harsatna tam tak sutkian a ni tawh," a ti.
Mizorama loneitute hmasawnna atan leh an thlai thar hralhna kawnga an buai lohna turin a takin FPO hman a ngai tih sawiin Numal Momin chuan, "Tun dinhmunah Mizorama FPO 30 vel awm hi sum hmuh nana hmang an awm niin a lang," a ti a; FPO chu a nihna ang tura din leh hnathawk pakhat mah an awm loh thu a sawi.