Ngawrh zawkin kawng chhia siam tum

National Highway no. 6 kawngpui chhe lutukte chu tun karah hian ngawrh zawka siam tum a ni a, hei vang hian lirthei lian (HMV)-te chhûn lamah tlân phal a ni dawn lo.

Kolasib SP chuan September 14, 2024 khan hriattirna chhuahin, September 15-21, 2024 chhung Kolasib leh Durlui (Khamrang) inkarah zing dar 9 aṭanga tlai dar 5 thlengin lirthei lian (HMV)-te tlan phal a nih loh thu a tarlang.

Kolasib SP tarlan danin, Aizawl lam pan tur truck-te chu Rengte­kawnah zing dar 8 aṭangin dan a ni ṭhin dawn a; lirthei lian tlan phal loh hian mipui ni tin mamawh - buhfai, gas leh tuialhthei phurte erawh a huam lo.

Traffic SP Stephen Lalrinawma pawhin hriattirna chhuahin, Durlui (Khamrang) aṭanga Kolasib kawng chak zawka siam a nih theih nan September 18-20, 2024 chhung zing dar 9 aṭanga tlai dar 5 thleng khâr a nih dawn thu a tarlang. Traffic SP tarlan danin, HMV-te chu Rangvamuala Ch. Saprawnga Truck Terminal-ah zing dar 8 aṭangin dan a nih dawn a; Lengpui aṭanga Sairang lam pante pawh Buichali lei pêla kal phal a ni lo.