CDF-Hualngoram ten ngaihdam an dil

Chin Defence Force (CDF), Hualngoram chuan Zokhawthar tleirawl pahnih September 1, 2024-ah man a, ni ruk chhung an hrên chungchangah ngaihdam an dil.

CDF mite chuan September 1, 2024 khan Zokhawthar rawlthar panga, Kenbo bike pahnih hmanga Rihdila kalte chu an lo tibuai a, tleirawl pathum an tlanchhiat hman laiin, pahnih - kum 15 mi leh kum 16 mi chu CDF-te'n an man a ni. Mi pahnihte chu Rihdil báwr vela ni hnih an hrèn hnuah September 3-ah Seik khuaa CDF jail-ah an khung a, September 6-ah an chhuah a ni. Mi pahnihte hi kut an thlak nual a, an lu an ziah kawlhsak bakah, an taksa hmun ṭhenkhatah meizial nungin an nawr a ni.

Mi pahnih an man chungchangah hian CDF-Hualngoram general secretary Lalrodinga chuan September 14, Inrinni khan Zokhawthar VC President hnenah thupha chawina leh ngaihdam dilna lehkha a thawn.

Lalrodinga chuan, Zokhawthar rawlthar pahnih CDF-Hualngoram sipaite'n an mante chu India khua leh tui an ni tih an hriat loh thu a tarlang a, "India khua leh tui an ni tih finfiah a nih veleh chhuahtir nghal an ni. Hriat chian loh avanga international law bawhchhiatna thlengah CDF-Hualngoram aiawhin ngaihdam ka dil e," a ti.

CDF-Hualngoram General Secretary chuan, September 11-a Zokhawthar VC leh tlawmngai pawl hrang hrang hruaitute leh CDF-Hualngoram hruaitute inkawmnaa thu an dah angin, CDF-Hualngoram sipaite leh Zokhawthar ṭhalaite inkara intihbuaina thleng chungchangah remna leh muanna awm zui tur zawnga hma an laho thei chu an lawm thu a tarlang bawk.