Lungleiah Lok Adalat buatsaih a ni

National Legal Services Authority-in India ram puma National Lok Adalat buatsaih tura a tih angin September 14, Inrinni khan Lunglei District Legal Services Authority chuan District Court-ah National Lok Adalat an buatsaih a; thubuai 118 ngaihtuahin, leiba inṭhìnna a tam ber.

Lungleia National Lok Adalat-a thubuai ngaihtuah tur hian bench pahnih buatsaih a ni a, bench-I chu Lunglei chief judicial magistrate Lalthansiami Hnamte-in a kaihruai a, bench-II chu judicial magistrate first class Lalbiakmuana'n a kaihruai.

Lok Adalat-ah hian court la thlenpui loh thubuai hrang hrang bakah, mimal thubuai chi hrang hrang 118 ngaihtuah a ni a, thubuai 60 chinfel a ni. Thubuai ngaihtuah zingah leiba inṭhìnna a tam ber a, thubuai chinfel taktea sum awm zat chu Rs 64,93,304 a ni.

Lok Adalat-ah hian thubuai neitute duh dan angin inremna ziahpui ṭhin a ni a, sum sèn ngai loin thubuai chinfel ṭhin a ni. Criminal compoundable case-te leh civil case chi hrang hrang ngaihtuah ṭhin a ni a; lung-ina intàntir zawnga kalpui a ni lo.