MSCPCR-in YouTuber an vaukhàn
Mizoram State Commission for Protection of Child Rights (MSCPCR) chuan tun hnaia Kulikawn, Aizawla doctor pakhat tualthihna chungchang video YouTube-a dahtu pakhat chu naupang humhalhna dan bawhchhiaa ngaih theih a nih avangin nimin khan an ko a; thu an zawhfiah bakah an vaukhàn.
MSCPCR aṭanga thu dawn danin, December 9, 2020 zana Kulikawna Dr Lalṭanpuia tualthihna chungchangah, pawi khawihna thlenga thuhretu (witness) naupang kum tling lo ṭhenkhat thlalak YouTube (digital media)-ah dah a nih avangin, a dahtu Zo Inspiration channel neitu chu MSCPCR hmaah inlan turin an ko a, nimin khan a inlan a ni.
Commission chairperson Sangzuali Vanchhawng chuan, tun hnaia YouTube, Facebook, Whatsapp leh digital media platform danga naupangte thlalak dan kalha pholan a ni ṭhin chu ngaihmawhawm a tih thu a sawi a, mi tin fimkhur turin a chah.
Sangzuali Vanchhawng chuan, "Hetiang hi nakin zela naupang an lo ṭhan len huna khua leh tui ṭha an nih theihna tur kawng dâltu leh mi dangin an chhinchhiah bik theihna tur thil pawi tak a nih avangin Juvenile Justice Act (JJ Act), 2015 Section 74 hnuaiah khap tlat a ni," a ti a; dan bawhchhetute chu hrem an nih theih nan Commission-in an koh zel tawh dawn thu sawiin, digital media leh social media hmangtute chu fimkhur turin a chah a ni.
MSCPCR hotute chuan Vanglaini palai zawhna chhángin, Zo Inspiration neitu an koh chhan video chu paih (delete) turin an hriattir a, hremna dang erawh an pe lo tih an sawi a; Dr Lalṭanpuia thihna kaihhnawiha naupang lang video dangte pawh an bawhzui mek tih an sawi bawk.
MSCPCR tarlan danin, JJ Act, 2015 Section 74 hnuaiah naupang, dan kalh a chê emaw, naupang venhim ngai emaw, pawi khawihna tuartu emaw, pawi khawihna thlenga thuhretu emawte chu an hming, address, sikul emaw, an chanchin dang eng pawh, an nihna tilang thei tur pholan leh puanzar khap a ni. Dan bawhchhiate chu thla ruk thleng tàntir leh Rs. 2,00,000 thleng chawitira hrem theih an ni.