Oil man Rs 5-a tihniam turin ngen

Mizoram Commercial Vehicle Union (MCVU) Gen.Hqrs chuan, Mizorama tuialhthei man sang chu petrol leh diesel-ah Rs 5 ve vea tihniam leh turin sorkar an ngen.

Lirtheia eizawng pawl 11 telna MCVU hruaitute chu September 13, 2024 khan an inhmukhawm a, sorkara an thil phûtte thuchhuah siamin an tarlang. "Diesel leh petrol man sang hi Rs 5 ve veah tihniam leh tura ngen ni se," tiin an rêl a ni.

MCVU chuan, Mizorama kawng chhe lutuk avanga khaw hrang hranga maxicab zingah tlan thei loa thla khat chhung ding tawhte an awm niin an tarlang a, "Mizoram châkkhai lak luhna kawng pawimawh Kawnpui-Sairang chhe lutuk te, Aizawl khawpui chhung kawng chhe lutukte avanga motor chhia a tamzia leh harsatna kan tawh chungchangah siamṭha turin sorkar ngen ni se," an ti.

MCVU TARLAN DANGTE

* Vehicle tracking device leh emergency button hi passenger vehicle-ah January 1, 2019 hma lama mi-ah chuan tihluihna tel loa owner duh thlannaah ngen ni se.

* Motor vehicle chhiah chungchangah grace period sorkarin min siamsak leh tura ngen ni se.

* Inter-state permit nei loa Assam aṭanga private motor passenger rawn phur ṭhin leh Mizoram aṭanga passenger phur thla ṭhin te, dan loa rawn service-te Transport department-a kan thlen tawhin awmzia a neih loh avangin kan thiam angin hmalak kan tum.

* India ram khawpui metropolitan city-a an hman ang Transport department-in autimated testing device hman an tum hi keini ang state rethei leh intodelh lo tan chuan hman loh ni se.