HPC(D) dan pawna hnâwl tha ti Vauna vangin VC-ah hming pe lut ngam lo

Nimina Home minister R Lalzirliana hoa a pisaa political party hrang hrang hruaitute ṭhukhawm chuan, HPC(D) chu dan páwna hnâwl ṭha an ti. Hetih lai hian, April 30, 2015-a village council inthlan turah Mizoram hmar lam tlangdungah chuan HPC(D)-te vauna vangin khaw eng emaw zatah hming pe lut an awm lo.

Home Minister pisaah hian nimin khan Mizoram hmar lam tlangdung khaw ṭhenkhata Health department hmalakna enfiah tura feh chhuak, Committee on Govern­ment Assurances-a MLA pathumte leh anmahni vengtute lambun an nih chungchangah all political party meeting koh a ni.
Meeting-ah hian political party tin aiawh an tel a, March 28, 2015-a HPC(D)-te'n MLA pathum an lambun chu pawi an tih thu leh HPC(D) chu an dem thu an puang a; HPC(D) chu sorkarin a hma thei ang berin dan páwnah hnâwlin, unlaw­ful organisation-ah puang se, an ti.
Meeting-ah hian H Zosangbera kaihhruai HPC(D) chungchanga sorkar kal dan tura an duhte an sawiho.
Hetih lai hian, April 30-a VC inthlan turah Mizoram hmun hrang hrangah candidate-te'n nimin khan hming an pek kim laiin, hmar tlangdunga khaw ṭhenkhatah chuan HPC(D) vauna vangin hming pe lut ngam an awm lo.
Thu dawn danin, Mizoram hmar tlangdung khaw hrang hranga political party hruaitute chu HPC(D)-te'n telephone hmanga biain, common candidate an siam thei lo a nih chuan a hranpaa candidate siam lo turin an ti a; hei vang hian political party-te chuan candidate an siam ngam lo a ni.
Hetih lai hian, hmar tlangdung khaw ṭhenkhatah chuan nomination thehlut an awm tho a, a ṭhen chu HPC(D) aṭanga candidate siam lo tura an tih hmaa nomination lo theh­lut tawhte an ni.
Mizoram district paruka VC leh Aizawl khawpuia LC inthlan tura nomination paper thehluh hun chu nimin tlai khan a tawp a; nomination paper-te chu vawiin hian endik a ni ang a, April 16 chhun dar 12 thleng inhnuhdawhna hun hawn a ni ang.