Kawng siam phûtin Durtlang mipui pungkhawm
Durtlang khuaa YMA Joint Action Committee (JAC) huaihawtin nimin zing dar 9:00 aṭanga dar 11:00 inkar khan Durtlang huam chhunga kawngpui siam ṭhat phûtin Leitanah mipui an pungkhawm a, kawngpui an dang.
Leitanah hian inkhawm tawi buatsaih a ni a, Durtlang YMA JAC chairman R Lalpeka'n a kaihruai. Durtlang, Durtlang North leh Leitan branch YMA aiawhte'n thu an sawi.
Mipui pungkhawmte chuan resolution an pass a; Durtlang mipuite'n kum 30 hma lama kawngpui zauhna atana ram an pek tawh hnuah, tun thlenga hmalakna leh kutthlakna a la awm lo chu hriatthiam har an tih thu te, a rang thei ang bera kawngpui siam an phût. Durtlang Joint YMA-te'n kawngpui siam ṭhat a nih theihna atana hma an lakna chu a tàwp thlengin mipuiin an thlawp tlat tur thute an tarlang.
Durtlang YMA JAC hruaitute sawi danin, March 2014-ah kawng siamtu BRTF hnenah fûrpui thlen hmaa kawng siam ṭha turin an ngen a, BRTF hruaitute chuan kawng chu an siam tur thu an lo hrilh a ni.
Kawng chu siam a nih loh avangin kumin tìr lamah BRTF hotute hnenah kawng siam tura ngen an tum leh tih sawiin, Durtlang JAC hruaitute chuan, "Sairang lam kawngpuiah National Highway a kal tawh avangin Durtlang khaw chhung kawng chu hluihlâwn tawh (abandoned road) a nih tawh thu leh, amah an hmuhin awmzia a neih tawh loh avangin sorkar hotute hmu zawk turin min hrilh a ni," an ti.