STAM-in NIT chungchang CM sawipui

Science Teachers Association Mizoram (STAM) hruaitute chuan nimin khan chief minister Zoramthanga chu a pisaah an kâwm a, National Institute of Technology (NIT), Mizoram hmasawnna tur an sawipui.

Chief Minister leh STAM hruaitute inkawmnaa an sawi danin, Lengpuia NIT hmun land lease chu Higher & Technical Education Secretary hminga siam a ni a, chu chu NIT, Mizoram hminga thlak a nih loh chuan sorkar laipui aṭangin grant tam ber pek chhuah theih a ni lo. Chu harsatna chu tihfel thuai a tum thu, CM Zoramthanga chuan a lo hrilh.

Lengpuia NIT campus chhungah Riverine Forest Reserve-a puan eng emaw zat a awm avangin, ram (thing, mau, etc.) tihchhiat man atan penalty cheng nuai 188 dáwn chawi a ngai. Riverine Forest Reserve chungchang chu Lengpuia NIT campus mai ni loin, Mizoram hmun hrang hrang nen a inkungkaih a, mipui tana harsatna thlen mektu a nih avangin Mizoram sorkar pawhin nasa taka a buaipui lai a nih thu Chief Minister chuan a lo hrilh.

STAM chuan, Riverine Forest Reserve area khawih chungchanga National Green Tribunal-a thu lo thlen ṭhintute chu insûm rih se an duh thu an tarlang. NIT hi Parliament-in Institute of National Importance-a a dah a nih avangin India ramah 31 chiah a awm. NIT, Mizoram hi kum 2010-ah din a ni a, Lengpuia an hmun nghet (permanent campus) tur chu October 13, 2012-ah a hun laia HRD minister Kapil Sibal-a’n a lungphùm a lo phúm tawh a ni.

STAM thuchhuah chuan, Mizoram páwna engineering college pangngaia admission chang lo Mizo ṭhalai tam tak an awm laiin, NIT Mizoram chu engineering college satliah ni lo, NIT a ni chunga Mizo ṭhalaite’n luhna tlâka an ngai lo chu thanat thlak an tih thu a tarlang a, "Hetiang zela a kal chuan NIT Mizoram hi a zuih ral mai ang tih kan hlau tak zet a ni," an ti.