Harsatna paltlang nasa ber kan ni: Zorama

MNF president Zoramthanga chuan, political party zingah MNF party aia harsatna leh hrehawm tuara paltlang nasa an awm lo niin a sawi a, "Sorkarna siam kan duh vek a, nimahsela, Pathianin hun a tih loh chuan eptu lamah min dah rih a ni," a ti.

MNF president hian nimin khan Mizo Hnam Runa inkhawmah thu sawiin, poli­tics-a an khingpui lian ber chu Congress party an nih thu sawiin, Central-ah, Mizoramah leh Mizorama district council zawng zawngah an sorkar laiin Congress-te chu Pathianin Central-ah a paih nin a sawi.

Zoramthanga chuan, "Pa­thian­in hun a tihah chuan virvawm hmangin an chaldárah min vawmsak a, an chakna bulpui ber Parliament-ah MP 543-ah 44 chauh neiin opposition leader pawh an hauh pha lo a; India ram khawpui ber, a záwna kum 15 an sorkarnaah artelukàwn ṭhakin a paih tawh a ni," a ti a; state dangah pawh Congress party chu an tlahniam zel niin a sawi.

April 6-11, 2015 chhunga New Delhi-a a zin chungchang sawiin, Zoramthanga chuan, PMO-ah prime minister Narendra Modi leh national security adviser Ajit Kumal Doval te nen Myanmar Peace Talk-a a palaina leh thil dangte an sawiho niin a sawi.

MNF President chuan, PM Narendra Modi hnenah Mizoramin thla kaw chhung leka Governor pasarih a nei chu Mizo mipui leh zirlai pawlte'n an kham tak zet tih a hrilh a, Governor ngêlnghet pe turin a ngen niin a sawi bawk.