MJA-te'n power tikhaihlak tam lo turin ngen

MJA, Lunglei district chuan thuchhuah siamin, Power & Electricity department-in Mizoram chhim lam power supply dinhmun a ṭhat zawk nana Zuangtui to Bukpui (Serchhip)-a 132 KV line-a disc insulator an thlak tur chu lawmawm an ti a, mahse power supply tikhaihlak tam lo zawnga tih ni thei se an duh thu an tarlang.

Lunglei MJA chuan, ni 12 chhung, April 14-24, 2015 chhungin zing dar 9 aṭanga tlai dar 4 inkarah Mizoram chhim lam zawngin kawlphetha an neih loh chuan kawng hrang hrangah harsatna leh buaina lian tak an tâwk ngei dawn tih an sawi a ni.

Lunglei MJA chuan, "Hun rei tak a záwna power supply awm lo turin P&E department hian ruahmanna dang siam thei se kan duh hle. Entirnan, ni thum chhung kan thim a nih chuan ni hnih dang êng ve leh ṭhin ila, a nih loh chuan kan thim chhunga êng kan hmuh ve theih nan temporary ang pawha alternative line min ngaihtuahsak ngei thei se kan ti. Chhim lam mipuite harsatna leh buaina tawh tur min ngaihtuahpui a, rei tak chhung thim lo tura ruahmanna min siamsak ngei turin P&E department kan ngen a ni," an ti.

MJA Lawngtlai district pawhin thuchhuah siamin, power line siam hna chu mipui harsatna thlen tam lo zawnga thawk turina an duh thu an tarlang a, "Mizoram chhim lamin power supply ṭha zawk a neih theih nana sorkar hmalakna a lawmawm kan ti a, mahse a ni záwna power supply hun rei tak pek loh hian mipuite harsatna tam tak a lo thlen tawh ṭhin avangin, mipui harsatna thlen tam lo zawnga hna thawh ni se kan duh," an ti a; power supply awm loh tur hriat lâwk theihah chuan mumal takin mipuiah puanzar ṭhin ni se an duh thu an sawi bawk.