Lunglei dáiah kawngpui An dang dawn

Lunglei South Ṭhalai Kawng Ṭha Duh Pawl-te chuan, Lunglei-Zobawk kawngpui chhe lutuk siam tura sorkar an ngenna leh phûtna tihhlawhtlin a nih loh avangin vawiin aṭangin tiamchin awm loin NH-54-A kawngpui an dang dawn.

Kawng dan tumtute chuan, Lunglei AOC-Zobawk inkar kawngpui chu siam ṭhat a nih theih nan nasa takin hma an la a, sorkar thuneitute vawi tam tak an dawr tawh tih sawiin, "Beiseina sang tak kan neih laiin kan beiseinate chu a thámral ta niin kan hria. Kan beisei leh kan duh dan ang loin hmalak a ngai ta hi pawi kan ti tak zet a ni," an ti.

Lunglei South Ṭhalai Kawng Ṭha Duh Pawl-te tarlan danin, sorkar hotute an dàwrnaah, Lunglei AOC-Zobawk kawng siamtu tur contractor thlan fel tawh nia hrilh an nih laiin, tun hnaia Assembly session-ah PWD changtu Chief Minister-in con­tractor thlan a la nih loh thu a sawi.

Lunglei South Ṭhalai Kawng Ṭha Duh Pawl hian NH-54-A chu vawiin aṭangin an dang dawn a, siam ṭha tura hmalak a nih hma chuan lirtheite'n zawh tawh rih lo se an duh thu an puang a ni. Kawng siam a nih theih nana an hmalakna chu hrethiama thlawp turin Mizoram mipuite an ngen bawk.