Kut thlak vangin Thana kawtah pungkhawm

Zohmingmawia, Maubawk, Aizawl nia insawiin Pathianni tlai khan Khumi w/o ZD Lalnelawma, Lunglei Salem Veng chu kut a thlâk avangin Lunglei Salem Veng ṭhalai eng emaw zat chu lungawi loin Lunglei Police Sta­tion kawtah an pung­khawm a; buaina lian zawk erawh a chhuak lo.

Thu dawn danin, Khumi hi a pasal nen damdawi-ina damlo an kan zawhah haw turin auto-rickshaw-ah a chuang a, auto-rickshaw-ah chuan Zohmingmawia leh vai an chuang ve a ni. Zohmingmawia chuan vai chu pawisa a dil a, a kawr iptea pawisa a ah ṭhenkhat chu a chhuhsak niin an sawi.

Zohmingmawia chu Chanmari sobji bazar pêng bulah a chhuk zet a, mahse rickshaw chu a ṭhianpa nen bike-in an ûm zui a, Ramthar Venga AOC pump bulah rickshaw chu an tiding. Zohmingmawia chuan vai chu pawisa a dil leh a, vaipain a neih loh thuin a lo chháng. Zohmingmawia chuan vaipa hnek a tum a, vaipa chu a lo thlêk hman avangin a bula ṭhu Khumi chu a hmaiah a hnek fuh ta a ni. Khumi chu nikhaw hre loin a awm nghal a, Faith Hospital-ah hruai a ni.

Zohmingmawia chet dana lungawi lo Salem Veng ṭhalai eng emaw zat chuan Zohmingmawia hmuh tumin Lunglei PS an pan a, buaina leh harsatna lian a thlen lo.

Police-te chuan Zo­hmingmawia chu a na thei ang bera hrem a nih theih nan hmalak an tum thu an sawi a; Zohmingmawia'n Khumi hliam enkawlna senso zawng zawng tumsak a intiam bawk avangin ṭhalaite chu zan dar 9 velah an ṭîn darh a ni.