Khawruhlianah V/C candidate awm lo

Khawruhliana NGO-te leh political party hrang hrangte ṭangho chuan, an khuaa V/C member awm thei zat tihtlem a nih avangin V/C inthlan atana nomination thehlut turte an dang. Hei vang hian Khawruhlianah V/C candidate an awm dawn lo.

Khawruhlian aṭanga thu dawn danin, an khua hian V/C member pasarih an awm ṭhin a, mahse pangaah tihtlem a ni. An V/C neih zat tihtlem a ni tih hi April 11, 2015-ah an hriat chauh avangin political party-te pawhin candidate tur mi pasarih an ruat niin an sawi.

V/C neih zat tihtlem a nih avang hian nimin zing khan NGO-te leh political party tin hruai­tute an inhmukhawm a, candidate tura thlan tawhte hming pek luh tur chu dan an rel a ni.

Khawruhlian khaw­tlang hruaitute sawi danin, an khuaah hian in 568 a awm a; sorkar record-ah erawh chuan in 423 a awm anga chhin­chhiah a ni thung.