Andrew-a ruat lailawk a ni: CM Hawla

Chief minister Lal Thanhawla chuan, Andrew Lalherliana chu MPSC chairman-ah hun eng emaw ti chhung (interim period) atan ruat lailâwk a nih thu a sawi a; MPSC chairman turin Manipur chief secretary ni mek PC Lawmkunga pension hun nghah mek a nih thu a sawi.

April 11, 2015-a New Serchhip YMA Hall-a Serchhip Block Congress hnuaia V/C candidate turte puanna inkhawmah thu sawiin, Lal Thanhawla chuan, "Assam hunlai khan Assam Public Service Commission chairman atan politician R Than­hlira, MP hman a ni a, politician tiin sawisel a ni lo. Mizoramah pawh MBSE chairman-ah Rev.Dr Lalchungnunga dah a nih khan rawngbawlna tlansan tih a ni ngai lo," a ti a; MPSC chairman leh member ruar tharte miin an sawisel chu a hriatthiam loh thu a sawi.

Lal Thanhawla chuan, Central-a BJP kaihhruai sorkar chu Kristiante nêkchêp mekah puhin, "Krista kraws leh biak-in tam tak an tichhe tawh a, prime minister Narendra Modi-a'n ṭum hnih Pa­thianniah CM meeting a ko tawh," a ti a; "Kristiante nêk râna hma latu BJP lo thawhpui ve chu Kristian, kohhran mi tan chuan zahna hliah hliah tur a ni," a ti.