BJP president Amit Shah a lo zin dawn

BJP, Mizoram Pradesh hruaitute chuan nimin khan Aizawl Press Club-ah thuthar thehdarhtute an kâwm a, BJP national president Amit Shah chu April 16, 2015 hian Mizoramah a rawn zin dawn tih an sawi.

BJP, Mizoram Pradesh vice president Chalngura Zahau chuan, Mizoram chu leilung hausa tak ni chung siin India rama state hnufual leh rethei berte zinga mi a nih thu a sawi a, "Prime minister Narendra Modi leh BJP president Amit Shah te hian hmasawnna kan neih theihna turin theihtawp min chhuahpui an duh a ni," a ti.

Chalngura Zahau chuan, Mizoramah BJP a ṭhang duang nia sawiin, "Member nasa takin kan pung a, Central BJP pawhin min ngai pawimawh hle. Central-a sorkarna kan chan aṭang khan lo kal tumin ruahmanna an siam ṭhin. Mahse, state hrang hrangah inthlanna neih a nih avangin an rawn kal hman lawk lo a ni," a ti.

Mizoram BJP hruai­tute sawi danin, Amit Shah hian April 16-ah Vanapa Hall-ah thu a sawi dawn bakah, thuthar thehdarhtute a kâwm dawn a; sakhaw zalenna chungchang te, governor chungchanga sorkar laipui ngaihdan te, bawng talh khap chungchangte leh Mizoram model state-a siam a nih theih dante a sawi dawn niin an sawi.