Sal anga chhawr Mizo pahnih chhanchhuak

Chennai Mizo Welfare Association (CMWA) hruaitute leh Tamil Nadu police-te chuan, April 10, 2015 khan Tamil Nadu thing­tlang khaw pakhata sal anga chhawr (bonded labour) mek Mizo tlangval pahnih - Pangzawl tlangval leh Lungleng tlangvalte an chhanchhuak.

CMWA general secretary H Lalchawimawia'n Vanglaini palai a hrilh danin, Mizo tlangval pahnihte hi Aizawl aṭangin hna hmuhsak tur anga sawiin agency pakhatin Ahmedabad-ah a hruai thla a; Ahmedabad aṭangin hna zawngin Chennai-ah an kal leh a ni.

Hna an zawn chhungin an pawisa neih sa a zo a; chumi hnuah vai pakhatin hlawh ṭha tak neia hna pe tur angin a hruai a, an duh huna báng thei tura tiamin thingtlang khuaah a hruai ta a ni. Chutah chuan an pahnihin Rs. 15,000-in a hralh a, hna chu an thawk ta a ni.

Hna thawk turin hmun hrang hrangah hruai kual an ni a, hna rim tak tak an thawhtir a; sal anga an lei hnam dang pahnih Odisha leh Maharashtra mi pahnihte nen an chhawr a ni. Ei tur ṭha an pe lo a, mutna ṭha an neih loh bakah, thla khatte an inbual lo a ni.

Anmahni chhawrtute chuan an veng uluk em em a, an tlanbo loh nan inthiar lai pawhin an veng ṭhin a, hna an thawh duh loh chuan an hrem ṭhin tih an sawi.

Mizo pakhat chuan a chhungte phone number a ziahna lehkha them a ipteah a hmu chhuak a, in pakhatah tlân lutin, telephone-in a chhungte chu thil awmzia a hrilh a, a chhungte chuan CMWA hruaitute an be pawp nghal ta a ni.

CMWA chuan hma an la nghal a, Mizoram sorkara secretary PC Lallawmsanga, IPS-in Tamil Nadu police-te chu ngaihven tura a ngen angin, police hotute chuan buaipui turin AIG V Baskaran leh ADG Rajendran-te an ruat.

Police-te leh CMWA hruaitute chuan Mizo pahnihte hna thawhna hmun, Chennai aṭanga km. 300 vela hla thingtlang khuaah an va chhan­chhuak ta a ni. Mizo tlangval pahnih leh anmahni ang bawka an hrên behte hlawh an pek loh pawh ni khatah Rs. 300 hlawh anga chhûtin Rs. 16,700 ṭheuh an pektir a, an document-te an chhuhsak nghal a ni.

CMWA hruaitute chuan, Chennai leh a chhehvela hna thawka awm Mizo an awm chuan, an hnathawhna chin leh an khaw­sak dan mumal tak hre ṭhin turin an chhungte an ngen a; phaia hna thawka kal hmain an hnathawhna tur hmun hre chiang hmasa turin an chah bawk.