Hnahthial DC-in MJA-te a kâwm

Hnahthial DC Vanlalmawia chuan nimin khan a pisaah Hnathiala MJA member-te a kâwm a, an district hmasawn zelna atan sorkar hnathawk, khawtlang hruaitu, civil society, media leh mipuite chu ṭang tlanga thawkho zel turin a sáwm.

Hnahthial district tihchangtlun nan sorkarin chak takin ruahmanna a kalpui nia sawiin DC chuan, "Kan district mamawhte chu kan sorkar hotute'n min ngaihtuahpui reng. District tihchangtlunna atan kum 2019-20 khan budget estimate-ah cheng nuai 150 leh additional fund cheng nuai 42.22 pek kan ni. Kumin 2020-21 hian cheng nuai 330.40 pek kan nih bakah, mamawh hrang hrang atan cheng nuai 5 pek belh kan ni," a ti.

Vanlalmawia chuan, district office hrang hrang hawn zel a nih thu sawiin, "Hnahthial Agriculture Sub-Division chu district office-ah hlan kai a ni tawh a, district treasury office atana luah tur pawh Accounts & Treasuries lamin an tifel tawh. Agriculture department hnuaia institute pawimawh tak, ITC Hnahthial chu School of Agriculture Sciences (SAS)-ah hlân a ni a, diploma course zir theihna tura tih a ni," a ti a; UDPA officer post siam a nih tawh thu a sawi bawk.

MJA member-te chuan, Hnahthial district hmasawnna tura sorkar hmalakna leh hnathawh hrang hrangte chu lawmawm an tih thu leh, MJA a ngaih pawimawh ṭhin avangin lawmawm an tih thu an sawi a ni.