Pathianin hun harsa atan MNF a ruat - MNF Vice President

MNF chuan nimin khan an party pisa, Mizo Hnam Rûnah Exodus Day an hmang a, kumin chhung atan an pisa chu an khâr nghal. Inkhawmah hian MNF vice president Lalthlengliana chuan, hun harsa atan Pathianin MNF a ruat niin a sawi.

MNF Vice President chuan, 'MNF a sorkar laiin ramin harsatna a tâwk ṭhin' tiin mi ṭhenkhatin an sawi ṭhin tih sawiin, "An hriat dik tâwk loh vang a ni. Hun harsa lo awm turah Pathianin MNF sorkar hi mipui hruai turin a ruat ṭhin a ni zawk. Covid-19 léng mek hi Pu Hawla sorkar lai chu ni se, zu avang leh hripui avangin kan buai nasa hle ang," a ti.

Hripui léng karah hmasawnna a châwl chuang lo nia sawiin Lalthlengliana chuan, "Kuminah hian tuilêt hnua la awm ngai lo thil thar tam tak a awm. Lockdown rûnpui lai kha buhfai kan ngah lai ber a ni a, kudam zawng zawng a khat vek a ni," a ti a; Chief Minister leh minister-te inpekna avangin Mizoramah Covid-19 vei leh hripui vanga thi pawh an tlem ber a, MNF-in VC 58% leh LC 83% an la tih sawiin, chungte chu hna an thawh ṭhat vang niin a sawi.

Lalthlengliana chuan, MLA aṭanga Lalduhoma bàn chungchangah, "Kum 1985-ah anti-defection law ngaihtuah a ni a, a ngaihtuahtute zingah Pu Duhoma pawh a tel. Dan siamtu tel bàn hmasak ber a ni. A awm tawhna party-ah atana hnawk tu mah an awm lo, ama tan amah a hnawk ber," a ti.

December 16 hi rambuai laia MNF sipaite East Pakistan (tuna Bangladesh)-a hual beh an nihna aṭanga chhan chhuah an nihna ní 'Exodus Day' tia an vuah a ni a, kum tin an hmang ṭhin. Nimina inkhawmah pawh hnam tana martarte sûnna hun leh ṭawngṭai rualna hun hman a ni.

Exodus Day pual hian Ex-MNA Association chuan Luangmuala Martar Thlanmual tihfai hnatlang an nei a, mi ṭhahnem tak an thawk chhuak. Martar Thlanmualah hian martar hming 1,563 bel tawh a ni.