Power supply ṭha duhin kal khawm

Tlabung leh a chhehvela kawlphetha ṭha lo lutuk vangin MZP sub-headquarters, Tlabung chuan nimin khan Tlabunga Power House tualah punkhawm an huaihawt a; resolution pass in, kawlphethaa an harsatna sukiang tur leh Power & Electricity, Tlabung section-ah qualified lineman pakhat tal dah turin sorkar an phût.

Tlabung MZP chuan, kum 1975 khan Mizoramah Power & Electricity department a awm ṭan thu leh a kum leh, 1976-ah Tlabungah P&E department hawn ve nghal a nih thu an tarlang a, "Ruah a sûr apiang deuh thawin Tlabungah mainline a chhe ṭhin a, siam a nih hnu rei lo têah current line a chhe leh ṭhin. Tun thlengin JE awpna hnuaiah kan la awm a, thawktu indaih lohna a nasa em em a, thawktu tam zawk dah turin sorkar kan ngen a ni," an ti.

Tlabung leh a chhehvel khuaah power supply a chhiat em avangin mipui nunphung a buai phah nasa a, zirlaite'n harsatna tam tak an tâwk ṭhin tih an tarlang a; Lungsen-Tlabung power line siamna tur hna thar a awm mek nia an hriat thu sawiin, a rang thei ang bera tihlawhtling turin sorkar an ngen tih an sawi bawk. Nimina Power House bulah an pun khawmnaah hian Tlabung MZP hruaitute bakah, tlawmngai pawl dang hruaitute an tel a ni.

1.    Tlabung power supply mainline chhe zing lutuk sutkian nan a ṭha thei ang berin 'jungle clearance' a rang thei ang berin tih ni rawh se.

2.    Tlabung chhunga electric hrui leh transformer-te a puak/alh nasa ṭhin a, mipui a tithlabár zing hle. Line zawng zawng check ṭhat ni rawh se.

3.    P&E, Tlabung Section-ah qualified lineman pakhat tal dah ni ve rawh se.

4.    Tlabung-Lungsen power line, 33 KV line siam hna a rang thei ang bera thawh ni rawh se.

5.    Sorkarin P&E department, Tlabung section-ah thawktu dah belh rawh se.