HPC (D) vangin khaw 26-ah nomination a lut lo Sum tlem thei ang ber hman kan tum: SEC
April 30, 2015-a local council leh village council inthlan turah HPC(D)-te'n nomination paper thehlut lo tura an vau avangin Mizoram hmar lam khaw 26-ah V/C chuh tura hming pe lut an awm lo. Hetih lai, State Election Commission (SEC) chuan VC leh LC inthlan turah pawisa a tlem thei ang ber hman an tum.
Aizawl khawpui chhunga local council inthlan turah chuan veng zawng zawngah hming pe lut an awm vek a, Mission Vengthlangah erawh chuan LC member ni laite chiah chuhtu an awm a ni.
VC inthlan turah erawh chuan Mizoram hmar lam khaw 26-ah hming pe lut ngam an awm lo a; chung zinga khaw 24 chu Aizawl district-a mi niin, khaw pahnih chu Kolasib district-a mi a ni. HPC(D)-te chuan an demand area-a political party-te chu common candidate an siam a nih loh chuan candidate siam lo turin an ti a ni.
Vanglaini palai zawhna chhangin, State Election Commission (SEC) hotute chuan, hming pe lut awm lohna khaw 26-te chungchanga thu kalpui zel dan tur chu sorkar thu thu a nih thu an sawi a, "Sorkar aṭangin engmah kan la dawng lo," an ti.
Hetih lai hian, Khawruhlianah chuan nomination thehlut turte khawtlang mipuiin an dan avangin nomination thehlut an awm lo. Khawruhlianah hian NGO leh political party-te'n V/C member zat pasarih ni ṭhin chu pangaah tihtlemsak an nih avangin an lungawi lo a, hming pe lut turte an dang a ni. Khawruhliana chhungkaw awm zat hi an khaw record leh SEC record a inmil lo a ni.
Khawruhlian chungchang hi SEC chuan a chhui chiang nghal a, NGO leh political party-te'n an khuaa in awm zat an sawi chu a dik avangin V/C pasarih pek leh tura tih a ni a; hming pek luhna hun hawn leh tum a ni.
Ruantlang Mualvengah chuan nomination thehlut awm mah se, khaw mipuite'n vote thlak an tum lo thung. Ruantlang Mualveng hian Ruantlang aṭanga V/C indan an phût a, sorkarin a tihhlawhtlin loh avangin khaw mipuite kalkhawm chuan lungawi lohna lantirna atana vote thlak loh an rel a ni.
V/C 536-a inthlan turah hian seat 2,266 a awm a, chungte chu general seat 1,660 leh hmeichhe tana seat hau 598 a ni. He thuziah lai thleng hian chuh tuma hming pe lut zat hriat kim a la ni lo. Aizawl khawpuia LC 83 inthlan turah seat 535 a awm a, general seat 392 leh hmeichhe seat 143 a ni. LC chuh tur hian mi mi 1,257-in hming an pe lut a, chungte chu general seat chuh tur mi 931 leh hmeichhe tana seat hauh chuh tur hmeichhia 326 an ni.
SEC hotute chuan, tun ṭum inthlan turah hian pawisa a tlem thei ang ber hman an tum thu sawiin, "DC-te hnenah pawh pawisa a tlem thei ang ber kan pe a, mahse DC-te'n an indaih lo deuh dawna an hriat avangin ngaihtuah belh a ngai mai thei," an ti. SEC hotute sawi danin, tun ṭum inthlan turah hian police-te pawh pawisa pek an ni dawn lo a, duty turin SEC chuan a ngen dawn a ni.