Court-in M/S zirtirtu 29 dah nghet turin thu pe

Gauhati High Court, Aizawl Bench chuan tun hnai khan middle school zirtirtu, contract-a thawk mek mi 29-te chungchangah thutlukna a siam a; zirtirtu 29-te chu dah nghet turin sorkar a hriattir.

Zirtirtute ukilte sawi danin, zirtirtu 29-te hi SSA hnuaiah kum 2003 leh 2004 khan M/S zirtirtu atan lak an ni a, kum 2008 khan state sorkar hnuaiah contract vêkin M/S zirtirtu atan dah an ni. Zirtirtute contract-a rawih an nihna chu Departmental Screening Committee rawtna angin kum tin pawhsei a ni.

Departmental Promo­tion Committee ni 14.9.2011 a ṭhukhawm chuan heng zirtirtute hi dah nghet tura rawtna sorkarah a thlen a ni.

Regularisation of Contract Employees Scheme, 2008 ang chuan, sorkar hna nghet lak dawnin lak tur zat aṭanga 20% chu contract basis-a thawkte tan zuah tur a ni a; kum nga contract basis-a thawk tawhte chu Departmental Promotional Committee kaltlanga chhawr an nih a, an thiamnain a phâk chuan an hnaa dah ngheh tur a nih thu zirtirtute ukilte chuan an sawi a; zirtirtute 29-te chu dah ngheh tura an tlin thu Court an hrilh.

Sorkar ukilte chuan zir­tirtute chu dah ngheh theih an nih loh chhan nia an hriatte sawi mah se, Court chuan dah ngheh turin thutlukna a siam ta a ni.

Court thutlukna ang chuan, zirtirtu 29-te chu June 1, 2013-ah kum nga an thawk tling tawh a, chuvangin June 2, 2013 aṭangin a ngheta thawk anga chhiar tur an ni. Order chhuah aṭanga thla thum chhungin Regularisation of Contract Employees Scheme, 2008 angin zirtirtute 29-te chu dah ngheh tura tih a ni.