Bungrua lilàm aṭangin Rs. 9,33,105 hmu
January 2014 aṭanga February 2015 thleng khan Bangladesh aṭanga Tlabung kaltlanga dan loa Mizorama bungraw lak luh, Customs department-in an mansak hnua lilàmna aṭangin Rs. 9,33,105 hmuh a ni.
Custom department chhinchhiah danin, Tlabung kaltlanga Bangladesh aṭanga bungraw lak luh an mante zingah in chhung mamawh bungbél leh thawmhnaw a tam ber a; ei leh in lam chi lâk luh erawh a awm mang lo.
Mizoramah India leh Bangladesh inkarah dan anga insumdawn tawnna kalpui a la ni lo a, hei vang hian Bangladesh aṭanga ram dang siam thil lak luh reng reng dân loa lo lut tihna a ni. Custom department-a thawkte chuan, ramri kâna bungraw tawlh luh a awm leh awm loh dap chhuah kawngah BSF nen an thawkho ṭhin tih an sawi.
Custom department hian January 2014 aṭanga February 2015 thlenga bungrua an man an lilàmna aṭangin sorkar sum báwmah Rs. 9,33,105 an chhung lut a; Bangladesh aṭanga bungraw lak luh nan hian meilawng an hmang bera hriat a ni.