Kum 15 chhungin human trafficking Tuartu Mizoram mi 30 chhinchhiah
Mizoram police-te chhinchhiah danin, kum 2000 leh kum 2014 inkarah mihringa sumdawnna (human trafficking) tuartu Mizo leh Mizoram mi 30 an awm a; mihringa sumdawnna kaihhawihah mi 40 man an ni.
CID (Crime) chhinchhiah danin, kum 2000-2014 chhung hian Mizoram mi a tuartua awmna human traficking case 19 a awm a; chutah chuan a tuartu chu mi 30 niin, human trafficking tihnaa inhnamhnawih mi 40 man an ni.
Kum 2010 khan Human trafficking tuartu Mizoram páwna chhanchhuah mi pathum an awm a; chungte chu CID (Crime) SP Joseph Lalchhuana, Anti-Human Trafficking-a nodal officer ni bawk hmalaknain Goa khawpui Panaji-ah chhanchhuah an ni. A mawhphurtute chu mi pathum an ni a, Mizo hmeichhia pahnih leh hnam dang pakhat an ni.
Kum 2011 khan Mumbai-ah Mizo pali chhanchhuah an ni leh a, chung mite hralh an nihnaa mawhphurtute chu Mizo hmeichhe pakhat leh hnam dang mipa pahnih an ni a, an vaiin man vek an ni.
Kum 2011-ah vek hian Mizorama cheng hnam dang hmeichhe tleirawl chu Haryana-ah chhanchhuah a ni a; ani hi nupui anga hruai thlain an hralh a ni. He thila mawhphurtu mi parukte chu hnam dang vek an ni a. Mizoram police CID (Crime)-te leh Haryana police-te'n an man vek a ni.
Chennai Mizo Welfare Association (CMWA) hruaitute leh Tamil Nadu police-te chuan, April 10, 2015 khan Tamil Nadu thingtlang khaw pakhatah sal anga chhawr (bonded labour) mek Mizo tlangval pahnih - Pangzawl tlangval leh Lungleng tlangvalte an chhanchhuak bawk.