Lungleiah thalaite'n kawng an dang

Lunglei South Ṭhalai Kawng Ṭha Duh Pawl (LSṬKDP)-te chuan Lunglei AOC leh Zobawk inkar kawng siam ṭha tura an phûtna tihhlawhtlin a nih loh avangin nimin zing aṭang khan tiamchin awm loin NH-54-A (Lunglei AOC - Hrangchalkawn) kawngpui an dang a; lirthei tlân tlang a awm lo.

LSṬKDP assistant secretary Vanlalliana'n Vanglaini palai zawhna chhanga a sawi danin, LSṬKDP-te hi Zobawk, Hrangchalkawn, Three Gate, Luangmual leh Lunglei AOC-ahte an duty a; lirthei kal reng reng an dan vek avangin lirthei tlân tlang a awm lo. Lirthei tam tak an tangkhang a, lirthei ṭhahnem tak chu an kîr leh a ni.

Hetih lai hian, hmalak dan tur ngaihtuah tur leh LSṬKDP-te nena thil sawiho turin nimin khan PWD chief engineer (Highway) chuan Lung­lei a pan a; an inbiak dan erawh kan hre hman lo.

LSṬKDP hmalakna hi Chhimbial Chhantu pawlte pawhin an thláwp a, nimina kawngpui dan­naah pawh Chhimbial Chhantu member eng emaw zat chu duty-in an thawk chhuak ve a ni.

Lunglei South Ṭhalai Kawng Ṭha Duh Pawl chuan thuchhuah siamin, kawngpui an dan chung­changa Mizoram PWD-in thuchhuah an siam chuan Lunglei South mipuite a barakhaih hle niin an sawi a, "Thu dik lo kan hotute'n an vawrh darh hi a lungchhiatthlak kan tiin inhmuhsitnaah kan ngai," an ti. PWD-in NH-54-A siam hna thawk tur contractor thlan fel a nih thu an hre sual anga Lunglei South Ṭhalaite a puh chu chhángin, "Hresualah kan inngai lo," an ti.

Lunglei South ṭhalaite tarlan danin, February 3, 2015-a Lunglei SDO (Sadar) lehkhaah chuan, PWD EE (NH Division-IV), Lunglei-in January 23, 2015-ah tender tihfel a nih tawh thu te, contractor thlan a nih thu te, Letter of Acceptance pawh pek a nih tawh thu leh, contractor atan M/s GP Project Ltd. thlan an nih thute tarlan a ni. Chu lehkha chu LSṬKDP pawhin an dawng.

March 11, 2015-a Lunglei SDO, PWD (Highway) SDO leh LSṬKDP chiarman ten meeting an neihnaah, kawng siam turin contractor-in labour 10 a rawih tawh thu te, hna ṭan thuai a nih tur thu te, roadroller leh tanker pawh a tûk lawka thleng tura beisei a nih thu te, contractor-in boulder trip 30 kawngpui sira a chhêkkhâwl tawh thu PWD SDO-in a sawi a ni.

LSTKDP chuan, an lehkha hmuh leh PWD SDO thusawite aṭang­in, kawng siamtu tur contractor thlan fel vek tawha an ngaih thu leh beiseina sang tak nen an nghah thu an sawi a; mahse March 24, 2015-a PWD changtu chief minister Lal Thanhawla'n Assembly session-a zawhna a chhannaah, contractor tur thlan a la nih loh thu a sawi leh si niin an sawi a, "Mak kan tiin min barakhaih hle a. Keini LSṬKDP-te chuan kan CM zahawm tak hian a hresualah kan ngai zawk a ni," an ti.

January 19, 2015-a minister of state for PWD Lal Thanzara leh PWD CE leh SE-te nen an inhmuhkhawmnaah, minister Lal Thanzara chuan kawngpui chhe lai a hmuna enpui a tiam bakah, a chhe zualpuite February 2015 chhung ngeia hnawh vek turin a tiam niin an sawi bawk.